Umusenateri muri sena ya Repubulika Iharanira demokarasi ya Congo yanditse ibaruwa asaba ko Alexis Tambwe Mwamba uyobora Sena y’iki gihugu akaba n’inkoramutima ya Joseph Kabila yakweguzwa kuri uyu mwanya.
Senateri Valentin Gerengo yandikiye ibiro by’inteko abimenyesha ko Thambwe Mwamba akwiye kuvanwa ku mwanya we, kugira ngo akurikiranwe n’ubucamanza.
Umutwe wa sena wateranye ejo kuwa kabiri ntiwatangaje kumugaragaro impamvu uwo musenateri ashaka ko ubakuriye yeguzwa, gusa abasenateri bagera kuri 60 bamaze gusinya bashyigikira ko umuyobozi wabo yeguzwa , nk’uko ibinyamakuru byandikirwa muri DR Congo bibitangaza.
Mu Ukuboza 2020, ubwiganze mu nteko ishingamategeko ya Congo bwarahindutse abashyigikiye perezida Felix Tshikedi baba benshi kurusha abashyigikiye Joseph Kabila.
Kuva icyo gihe hatangiye inkubiri yo kwigizayo abategetsi bakuru bo ku ruhande rwa Joseph Kabila bahereye kuri Minisitiri w’Intebe Ilunga.
Kuwa gatanu ushize, Minisitiri w’intebe Sylvestre Ilunga Ilukamba, usanzwe ari ku ruhande rwa Joseph Kabila, nawe yegujwe n’inteko ishingamategeko.
Alexis Tambwe Mwamba akekwaho kuba yaranyereje amafaranga agera kuri miliyoni 7 z’amadorari ya Amerika, kubw’iyi mpamvu bikaba bivugwa ko igihe yaba amaze kweguzwa yakurwaho ubudahangarwa ahabwa n’itegekonshinga agahita akurikiranwa n’ubutabera bw’iki gihugu.
Tambwe Mwamba yahakanye ibi ashinjwa byo kunyereza imari ya leta, kandi yameje ko yiteguye kwegura, mu ijambo rigufi yashyikirije nyuma y’inama ya sena ejo kuwa kabiri.
