Umugaba mukuru wungirije ushinzwe urwego rw’ubutasi bwa gisirikare muri Repubulika ya Demokarasi ya Kongo Gen. Delphin Kahimbi yapfiriye iwe mu rugo kuri uyu wa 28 Gashyantare 2020 bivugwa ko yaba yiyahuye nkuko 7 Sur 7 dukesha aya makuru ibitangaza.
Ku rundi ruhande, amakuru dukesha ibiro ntaramakuru Reuters avugako yaraye apfuye azize indwara y’umutima, ni ko umugore we yabitangaje. Ibi bije nyuma y’amasaha atageze kuri 24 yegujwe kuri iyi mirimo ye, aho hakurikiyeho gukorwaho iperereza ku birego byo gushaka guhungabanya igihugu, nkuko bitangazwa.,
Jenerali Delphin Kahimbi yari asanzwe yarafatiwe ibihano n’umuryango w’ubumwe bw’Uburayi (EU/UE) ku birego byo guhonyora uburenganzira bwa muntu ubwo yayoboraga ibikorwa bya gisirikare byo kurwanya inyeshyamba mu burasirazuba bw’igihugu mu myaka ya 2000 ndetse no mu gihe yari amaze ayobora ubutasi bwa gisirikare.
Kahimbi yari yashyizweho na Joseph Kabila wahoze ari Perezida wa Kongo.
Uwamusimbuye ku butegetsi, Félix Tshisekedi, yari amaze igihe yotswa igitutu na Leta Zunze Ubumwe z’Amerika ngo akurikirane Jenerali Kahimbi ku birego byo guhonyora uburenganzirwa bwa muntu.
Mu kiganiro kuri telefone, umugore we, Brenda Kahimbi, yabwiye Reuters ati: “Yari yagize ikibazo cy’umutima ari mu rugo nuko aza gupfa hashize akanya gato tugeze ku bitaro”.
Abantu babiri bakora mu nzego z’umutekano za Kongo babwiye ibiro ntaramakuru Reuters ducyesha iyi nkuru ko Kahimbi yari aherutse guhagarikwa ku mirimo ye ashinjwa gushaka guhisha intwaro ngo ahungabanye umutekano w’igihugu.
Muri uku kwezi, Kahimbi yari yarabujijwe kuva mu gihugu, nkuko abo bantu babiri bo mu nzego zishinzwe umutekano n’abandi babiri bakora mu rwego rw’abinjira n’abasohoka babibwiye Reuters.
Igisirikare cya Kongo cyemeje amakuru y’urupfu rwa Kahimbi ariko nticyemeza icyaruteye kandi nticyavuga ku byo yaregwaga cyangwa amakuru yuko yari yarahagaritswe ku mirimo ye.
Mu itangazo ryatanzwe mu buryo bwa videwo, Don de Dieu Kilumba, uhagarariye urwego rukuru rwa gisirikare rwa Kongo, yagize ati:
“Uburyo bwose bwakoreshejwe hagamijwe gutanga umucyo kuri iki gihombo kibabaje”. Yongeyeho ko hatangiye iperereza ku rupfu rwe.
Mu kwezi kwa cumi na kabiri mu mwaka wa 2016, Kahimbi yashyizwe ku rutonde rw’umuryango wa EU rw’abategetsi ba Kongo bafatiriwe imitungo ndetse batemerewe kugirira ingendo mu bihugu bigize EU.
Mu gusubiza ku makuru yuko Kahimbi yahagaritswe ku mirimo ye, ambasaderi w’Amerika muri Kongo, Mike Hammer, ku wa kane yanditse ku rubuga rwa Twitter ati:
“Nkuko tutahwemye kubivuga, abamunzwe na ruswa, bahonyora uburenganzira bwa muntu cyangwa bagahungabanya ibikorwa bya demokarasi bakwiye kubiryozwa”.
Ndacyayisenga Jerome
