Inyeshyamba za RUD URUNANA zongeye kugarika ingogo muri Binza,abaturage barashyira mu majwi Cpt.Nshimiyimana Cassien uzwi ku mazina ya Gavana.
Umutwe w’Inyeshyamba za RUD URUNANA ,igice kiyomoye kuri FDLRwiganjemo abasize bakoze Jenoside yakorewe Abatutsi mu 1994, ubarizwa muri Repubulika Iharanira Demokarasi ya Congo, wateye agace ka Binza uhungabanya umutekano w’abaturage mu ijoro ryo ku wa Gatanu rishyira ku wa Gatandatu tariki 17 Mata 2021.
Ako gace bateyemo gaherereye muri Teritwari ya Rutshuru mu bilometero 137 uvuye i Goma mu Murwa Mukuru w’Intara ya Kivu y’Amajyepfo.
Umwe mu bantu bazwi batuye muri aka gace, Aimé Mbusa Mukanda, yatangaje ko aba barwanyi bateye abaturage bakabasahura, bakabishyuza imisoro nta nyemezabwishyu babahaye, bakabatwara ihene 14 ndetse bagakora n’ibindi bikorwa byo kubabuza umutekano.
Mukanda yasabye leta ko yakohereza ingabo zo kurindira umutekano abaturage, ikirukana imitwe y’abarwanyi imaze iminsi yibasira aka gace ko mu Ntara ya Kivu y’Amajyaruguru.
Yatangaje ko kandi atewe impungenge n’abayobozi baharanira inyungu z’abaturage mu gihugu batitaye ku mutekano wabo.
Intara ya Kivu y’Amajyaruguru ikunda kuberamo ibitero bya hato na hato ahanini kubera ko ikambitsemo imitwe y’inyeshyamba myinshi.
Mu biheruka kuhabera ni imirwano yabereye mu gace ka Kihisi tariki ya 11-12 Mata 2021 yashyamiranyije abo mu bwoko bw’abanandes n’Abahutu bagatemana bagakora n’ibindi bikorwa by’urugomo abantu benshi babura ubuzima abandi barakomereka.
Umutwe wa RUD URUNANA ukuriwe na Col Faida,wasimbuye Gen.Kagoma uherutse kwicwa na FARDC,usanzwe ufite ibirindiro muri ako gace ka Binza,cyane ahitwa Giseguro,Katanga,Kigaligali,Mikotokoto na Nyabanira,na Mpimbi umaze iminsi uyogoza aka Karere mu mpera z’umwaka wa 2019,ukaba waragabye igitero mu Kingi wica abaturage b’Abasivili,uyu mutwe kandi ufitanye umubano wihariye na RNC ya Kayumba Nyamwasa.
Mwizerwa Ally
