Ibi byashimangiwe n’ibaruwa yandikiwe Guverineri w’i Ntara ya Tshopo uyu mutwe ubarizwamo aho bamumenyeshaga ko bashyigikiye M23 ngo bakureho ubutegetsi bwa Perezida Félix Tshisekedi.
Sibyo gusa kandi, muri iyo baruwa basabye uyu muyobozi kubuza ingabo za Congo n’imitwe bafatanyije kongera gukandagora mu duce twose two mu ntara ya Tshopo harimo na teritware ya Bafwasende iyobowe n’uyu mutwe.
Iyi teritwari ihanye imbibi na teritware ya Lubero aho M23 imaze kwigarurira twinshi mu duce twaho.
Uyu mutwe ugizwe n’abayoboke bavuye mu moko atandukanye abarizwa muri iyi ntara cyane cyane ubwoko bwa Lombi.
Nkuko tubikesha amasoko atandukanye, uyu mutwe uyobowe na General Shokoro akaba azwi nk’indwanyi ikomeye ku buryo yihaye ipeti rya General.
General Shokoro yatangaje ko ingabo ze yamaze kuzishingira ubuyobozi mu bice byose bigize teritware ya Bafwasende kandi uyu mutwe ukaba uri hafi y’uduce two muri teritware ya Lubero twigaruriwe na M23 idukuye mu maboko ya FARDC n’abafatanyabikorwa bayo.
Iyi baruwa y’uyu mutwe yashyizweho umukono n’abaturage 116 bo mu bwa Lombi bashyigikiye ibi bikorwa . Aba baturage kandi bakomeje kunenga ingabo z’igihugu cyabo ko kidafite ubushobozi bwo kubarindira umutekano.
Ubu buyobozi bw’uyu mutwe ndetse n’imikoranire yabwo na M23 ntibiremezwa.
Cynthia NIYOGISUBIZO
