None kuwa Gatatu tariki ya 28 Ukwakira 2021 Urwego rw’Igihugu rw’Ubugenzacyaha RIB rwatangaje ko rwataye muri yombi Hakuzimana Abdul Rashid akurikiranweho ibyaha birimo icyo gupfobya no guhakana Jenoside yakorewe Abatutsi mu mwaka 1994.
Mu butumwa bwatangajwe n’uru rwego rubinyujije ku rubuga rwa Twitter buragira buti”Uyu munsi, RIB yafunze Hakuzimana Abdoul Rashid ukurikiranweho ibyaha byo guhakana no gupfobya Jenoside yakorewe Abatutsi muri 1994 n’icyaha cyo gukurura amacakubiri mu Banyarwanda.”
RIB yatangaje ko ubu Rashid Hakuzimana afungiye kuri sitasiyo ya RIB ya Kicukiro mu gihe iperereza ku byaha aregwa rigikomeje hanatunganywa Dosiye ngo babone uko ishyikirizwa ubushinjacyaha nk’uko amategeko abiteganya.
Rashid yagombaga kwitaba RIB kuwa 27 Ukwakira 2021 nkuko ibaruwa yandikiwe n’ubugenzacyaha kuwa 25 Ukwakira 2021. Kuwa 27 Ukwakira nibwo Umuvugizi wa RIB Dr Murangira B Thierry yatangaje ko Rashid niyongera kwanga kwitaba ubugenzacyaha hazakurikiza icyo amategeko ateganya.
Itegeko Nshinga ry’u Rwanda riha buri munyarwanda uburenganzira bwo gutanga ibitekerezo, ariko ntawe ufite uburenganzira bwo kubyitwaza ngo abibe amacakubiri mu banyarwanda cyangwa akora ibindi byaha bihanwa n’amategeko.
