Kuri uyu wa Gatanu tariki ya 17 Mutarama 2020, Urwego rw’Igihugu rw’Ubugenzacyaha (RIB) rwerkanye abagabo babiri aribo Herman Nsengimana wari umuvugizi w’umutwe wa FLN na Mutarambirwa Theobald wigeze kuba Umunyamabanga Mukuru wa PS Imberakuri, Bakurikiranyweho ibyaha binyuranye birimo ibyo guhungabanya umutekano w’u Rwanda.
Umuvugizi w’Urwego rw’Igihugu rw’Ubugenzacyaha (RIB) Marie Michelle Umuhoza yavuze ko aba bagabo bakekwaho ibyaha by’iterabwoba, kurema umutwe w’iterabwoba, ubwicanyi, guhakana Jenoside yakorewe Abatutsi n’ibindi.
Aba bagabo Nsengimana na Mutarambirwa bazanywe mu Rwanda tariki 16 Ukuboza 2019. Gufatwa kwabo bikaba byaturutse ku bitero by’ingabo za FARDC zimaze zigaba ku mitwe yitwaje intwaro mu burasirazuba bwa Repubulika Iharanira Demukarasi ya Congo (RDC).
RIB ivuga kandi ko yatangiye iperereza, nirirangiza izashyikiriza dosiye ubushinjacyaha.
Herman Nsengimana yavuye mu Rwanda muri Mata 2014, akaba yari mu ishyaka rya RLM rya Nsabimana Callixte.
Umutwe w’Iterabwoba wa FLN washinzwe na Paul Rusesabagina hamwe na Faustin Twagiramungu, mu gihe raporo y’Umuryango w’Abibumbye ONU ivuga ko ufite imikoranire na P5 ya Kayumba Nyamwasa utavuga rumwe na Leta y’U Rwanda.
Ubwanditsi
