Ikigo cy’Igihugu Gishinzwe Ubuzima, RBC kiratangaza ko umwe mu barwaye COVID-19 yabyariye mu kigo ari kuvurirwamo, kandi ko we n’umwana yibarutse bameze neza.
Mu butumwa bwanyujijwe kuri Twitter, RBC yavuze ko uyu mubyeyi ari mu bari kuvurirwa mu kigo cya Rugerero mu Karere ka Rubavu, akaba yabyaye umwana w’umuhungu.
Uyu mubyeyi w’imyaka 41 wagaragaweho icyo cyorezo cya Covid19 akaba yibarutse umwana w’umuhungu, gusa kugeza uyu ,mwanya, uyu mwana wavutse bikaba bitaramenyekana neza niba yaba yavukanye ubwandu bwa Coronavirus, gusa ikizwi ni uko umwana ndetse na nyina wamubyaye bameze neza.
Ubu butumwa bugira buti “Tunejejwe no kubamenyesha ko umwe mu bavurwa COVID19 yibarukiye umwana w’umuhungu mu Kigo Nderabuzima cya Rugerero, kimwe mu bigo bivurirwaho abarwaye iki cyorezo mu Rwanda. Umwana na nyina bameze neza.”
Ni ubwa mbere mu Rwanda umugore uri kuvurwa Coronavirus abyariye aho ari kuvurirwa ariko mu bindi bihugu byakunze kubaho kenshi.
Abaganga b’i Paris mu Bufaransa batangaje ko muri kiriya gihugu umwana wa mbere yavukanye ubwandu bwa COVID-19 abwanduje n’umubyeyi we wari umutwite.
Mu kinyamakuru cyandika ku buvuzi ‘Nature communications’, Dr. Daniele De Luca yagize ati “Twagaragaje y’uko umubyeyi ashobora kwanduza umwana atwite mu cyumweru cya nyuma cy’inda.”
Ubu kuri uyu wa Kane tariki 16 Nyakanga 2020, mu Rwanda hamaze gufatwa ibipimo bya Coronavirus 200 358 muri rusange.
Iki cyorezo kimaze guhitana abantu bane, kimaze kugaragara ku bantu 1 473 barimo 770 bagikize ndetse banasubiye mu ngo zabo.
Iyi nkuru tuyanditse ku Isi hose umubare w’abamaze kugaragaraho iki cyorezo ari 13 833 957, kikaba kimaze guhitana 590 650 naho abagikize bakaba ari 7 738 819.
Ndacyayisenga Jerome
