Abantu bivugwa ko ari FARDC Wazalendo bashimuse abaturage 22 bo mu murenge wa Busasamana
Amakuru Rwandatribune ikesha Televiziyo TV10 ivuga ko mu Karere ka Rubavu,Umurenge wa Busasamana,Akagari ka Kageshi ejo kuwa kabiri taliki ya 03 Nyakanga 2024 mu masaha ya saa kumi abaturage bari mu bikorwa by’ubuhinzi mu kibaya cya Kanyesheja ,bashimuswe n’abarwanyi batasobanukiwe neza ariko amakuru menshi agahamya ko harimo aba Wazalendo n’ingabo za FARDC zigenzura ako gace Congo-Kinshasa ihuriraho n’uRwanda.
Umuyobozi w’Akarere ka Rubavu yemeje ayo makuru ubwo yaganiraga n’Umunyamakuru wa TV10 Oswald Mutuyeyezu,gusa Meya Mulindwa Prosper avuga ko abo baturage baje kurekurwa mu masaha ya saa mbiri z’umugoroba batanze amafaranga angana n’ibihumbi Magana atatu mirongo inane(380.000frw).
Isoko ya Rwandatribune iri muri ako gace ivuga ko kuba abaturage baba bashimutiwe k’ubutaka bwa Congo cyangwa ubw’uRwanda harimo urujijo kuko imipaka y’icyo kibaya idasobanutse,uyu mutangabuhamya kandi avuga ko hakiri urujijo rwo kwemeza ko abari bashimuse abo baturage ari abo muri Wazalendo cyangwa FARDC kuko bamwe mu bashimuswe bavuga ko batari abakomgomani dore ko bavugaga ikinyarwanda gitomoye bitandukanye n’abanyekongo,gusa abari babafashe bakomeje urugendo berekeza mu gace k’ibirunga.
Kugeza ubu usibye Umuyobozi w’Akarere ka Rubavu wagize icyo avuga kuri iki gikorwa cyateje umutekano muke muri ako gace,nta rundi rwego rw’umutekano rurabihakana cyangwa ngo rubyemeze .
Uwineza Adeline
Rwandatribune
