Ubwo yasuraga Akarere ka Rulindo kuwa kane tariki 13 Mutarama, 2022 Umuyobozi w’Intara y’Amajyarguru Madamu Nyirarugero Dancilla yasabye Ubuyobozi bw’Akarere gukemura ikibazo cy’ubucucike mu mashuri bukigaragara muri amwe mu mashuri yo muri ako Karere.
Ni uruzinduko rwari rugamije kureba aho gahunda yo gukingira abanyeshuri mu Karere ka Rulindo igeze, muri uru ruzinduko Umuyobozi w’Intara y’Amajyaruguru akaba yari aherekejwe n’Umuyobozi w’Akarere ka Rulindo Madamu Mukanyirigira Judith, Umuyobozi ushinzwe uburezi mu Karere, ndetse n’Umuyobozi ushinzwe gahunda yo gukingira bakaba barasuye ibigo by’amashuri bitandukanye byo mu Mirenge ya Mbogo, Cyinzuzi, Burega na Ngoma.
Bimwe mu bibazo byagaragaye muri uru ruzinduko ni ubucucike muri amwe mu mashuri aho hari amashuri byagaragaye ko adafite intebe abanyeshuri bicaraho nko ku ishuri rya G.S Remera riherereye mu Murenge wa Cyinzuzi.
Kuri iri shuri hagaragara ubucucike bukabije mu banyeshuri biga mu mashuri abanza aho usanga hari aho bicara ari bane(4) ku ntebe ibintu Umuyobozi w’Intara yagaragaje ko biteye inkeke muri ibi bihe turimo byo guhangana n’Icyorezo cya COVID 19 cyugarije Isi.
Umuyobozi wa G.S Remera Bwana Busoro Bartheremy aganira n’Itangazamakuru yavuze ko iki kibazo cy’ubucucike muri iri shuri cyatewe n’uko nta ntebe bafite ariko ko yandikiye Akarere akamenyesha iki kibazo ndetse n’umubare w’intebe bakeneye kugira ngo bakemure iki kibazo ariko Akarere kakaba nta gisubizo kari kabasubiza.
Ati “ nandikiye Akarere nkamenyesha iki kibazo ndetse mbaha n’umubare w’intebe zikenewe kugira ngo iki kibazo gikemuke ariko nta gisubizo bampaye kandi Akarere niko kagomba kugura izi ntebe.”
Ku ruhande rw’Akarere ka Rulindo Umuyobozi ushinzwe uburezi mu Karere Bwana Nuwayo Jean Dennis yavuze ko iki kibazo bakizi ariko ko muri iyi ngengo y’Imari ya 2022/2022 nta bushobozi buhari bwo kuba bagura izi ntebe kuko ubushobozi bwari buhari babukoresheje mu kwishyura ibirarane by’inyubako z’amashuri, bityo iki kibazo cyo kugura intebe zikenewe mu mashuri yo mu Karere bakaba baravuganye na MINEDUC ko kizakemuka mu ngengo y’Imari y’Umwaka wa 2020/2023.
Nubwo uyu muyobozi atangaza ibi ariko, Umuyobozi w’Intara y’Amajyaruguru Madamu Nyirarugero Dancilla we yabasabye gukora ibishoboka iki kibazo kigakemuka mu gihe cya vuba.
Norbert Nyuzahayo
