Mugihe habura Amasaha make ngo hamenyekane imyanzuro iri bufatwe kuri gahunda ya ‘Guma mu rugo’ nk’uko ayatanzwe ateganyijwe kurangira ku ya 30 Mata 2020 ndetse no kubahiriza andi mabwiriza yo kwirinda ikweirakwira rya Covid19 yashyizweho na Minisiteri y’ubuzima,abaturage bo mu karere ka Rulindo baracyacengana n’abayobozi mu gushyira mu bikorwa ayo mabwiriza.
Umuyobozi wa karere ka Rulindo Bwana KAYIRANGA Emmanuel yagize ati “Mu ngamba zafashwe mu kwirinda ikwirakwira ry’icyorezo cya Covid19 ntihakwiye kuba harimo gucengana kuko kwirinda ni inyungu ya buri wese, si ngombwa gutegereza ko ubuyobozi buhoza ijisho ku muntu.”
Ibi,Bwana Kayiranga yabivuze ashingiye ku kuba muri aka karere hakiri abaturage batari bumva neza amabwiriza yashyizweho na Minisiteri y’ubuzima yo kwirinda gukwirakwiza icyorezo cya coronavirus bakarenga ku mabwiriza bashinga utubari mu ngo zabo.
Uyu muyobozi yavuze ko kutubaha amabwiriza yo kwirinda ikwirakwira rya Covid19 ariukwigira ntibindeba kandi ko ingaruka zigera cyane ku banze kumvira n’imiryango yabo.
ku rundi ruhande hari abaturage banenga bagenzi babo bakorera ku jisho ry’abayobozi mu gukurikiza amabwiriza yo kwirinda ikwirakwira rya Covid19.
Rwandatribune. com yaganiriye na NDAYISENGA Daniel.Uyu yasabye bagenzi be kubaha amabwiriza yashyizweho kuko kutayitaho bishobora gushyira ubuzima bw’abagerageje kwirinda mu kaga kuko byatuma icyorez kidacika vuba bityo ababashije kwirinda bakagirwaho ingaruka zo gukomeza kuguma mu rugo mu gihe iyo bose bumvira byari kwihutisha gahunda yo gusubira mu mirimo yabo.
Akaba asaba Abaturage ,bagenzi be kugerageza Kubahiriza amabwiriza yashyizweho na leta yo kwirinda coronavirus aho kwirirwa bahangana n’abayobozi ,bababwira ngo nibubahirize ayo mabwiriza kuko ubuzima barinda ari ubwabo.
Kuri uyu wa 29 Mata 2020 minisiteri y’ubuzima yatangaje ko abamaze kwandura Coronavirus ari 225,abanduye bashya ni 13 mu bipimo 1705,abakize ni 98,abakirwaye 127, akaba ari ntawe urahitanwa n’iyi ndwara.
MASENGESHO Pierre céléstin
