Kuri uyu wa gatatu tariki 3 Nyakanga 2024 Ishyaka riharanira Demokarasi no kurengera Ibidukikije Green Party ryiyamamarije mu karere ka Rutsiro mu murenge wa Musasa, Santere ya Rusiza rikomereza mu karere ka Karongi mu murenge wa Rubengera.
Ishyaka Green Party rirangajwe imbere na Dr Frank Habineza ryakiriwe n’abaturage bitabiriye ibyo birori ku bwinshi nuko ribagezaho imigabo n’imigambi rifitiye abanyarwanda muri rusange.
Dr Frank Habineza akaba na kandida Perezida w’ishyaka Green Partyyijeje abaturage ko natorwa mu rwego rwo kwita ku baturage no kubungabunga ubuzima bwabo azongerera abaganga umushahara bakajya bavura abaturage bishimye.
Ibi abitangaje nyuma yuko avuga ko yavuganiye abarimu bakongezwa umushahara avuga ko uwo bahembwaga wari hasi cyane kuri ubu ngo abatahiwe ni abaganga.
Dr Frank Habineza yavuzeko abaganga ari abantu bingenzi mu buzima bwa muntu ko bakwiye guhembwa neza kugira ngo bibafashe kwita ku barwayi neza kandi babikore bishimye.
Si ibyo gusa yemereye abaturage bo mu karere ka Rutsiro, kuko yanabijeje kurandura ubushomeri mu rubyiruko aho usanga abana barangiza amashuri nyamara bakamara imyaka batarabona akazi ko natorwa azarandura ubushomeri burundu.
Dr Frank Habineza yakomeje asaba abaturage bako karere amajwi bakazatora kandida perezida Dr Frank Habineza ndetse n’abakandida depite b’ishyaka Green Party.
Ibikorwa byo kwiyamamaza bikaba biteganyijwe ko bizakomereza mu karere ka Rwamagana.
Icyitegetse Florentine
Rwandatribune.com
