Tigrayans ni ubwoko bw’abaturage ba Ethioapia buherereye mu Majyaruguru ya Ethiopia hafi n’umupaka wa Eritrea. Ubu bwoko bugizwe n’imiryango itatu ikomeye ariyo Tigrayan, Irob na Kunama bose batuye mu gace ka Tigray.
Ibarura rusange ry’abaturage ryo mu mwaka 2007 ryagaragaje ko muri Ethiopia yose , habarurwa abaturage bagera kuri miliyoni 4.5 z’abaturage bo mu bwoko bw’aba –Tigrayans.Ni ubwoko buhuriye ku rurimi rumwe rwitwa Tigrinya.
Umubare munini w’abaturage ba Tigray ni bakirisitu. Muri aba bivugwa ko umubare munini wabo babarizwa mu idini ry’aba Orthodox b’abakiristu. Andi madini agaragara muri Tigray ni Abagaturika ,Abahakanyi n’Abayisilamu bagize umubare muto w’abatuye aka gace.
Merkelle ifatwa nk’umurwa mukuru wa Tigray ubusanzwe ituwe n’abaturage babahezanguni banze kuva ku buhinzi gakondo aho kugeza ubu bahinga , Amasaka, Ingano, Uburo, ibigori n’ibindi bihingwa ngandurarugo.
Aba Tigrey Kandi bagira umwihariko wabo , aho usanga muri iriya miryango itatu ibagize buri umwe uba ufite uwuhagarariye (Elder) aho akenshi abo bawuhagarariye bashobora kwemeza umuntu uzahagararira ishyaka ry’abaturage rya Tigray mu myanya imwe n’imwe y’Ubuyobozi bw’igihugu.
Ubuzima bw’abatuye Tigray umunsi ku munsi bushingira ku myemerere aho abizera baba Orthodox igihe kinini bakimara biyiriza ubusa mu rwego rwo gusengera ubwoko bwabo ngo Imana iburinde ikibuhungabanya.
Uko ishyaka (TPLF) ryigumuye kuri Guverinoma iyobowe na Dr. Abiy Ahmed
Ishyaka Tigrean People’s Liberation Front (TPLF) niryo rwari ryihariye imyanya myinshi y’ubutegetsi kuva mu mwaka 1991, kugeza mu mwaka 2018 ubwo Dr. Abiy Ahmed yatorewe kuyobora Guverinoma ya Ethiopia
Insinzi ya Abiy ntiyanejeje abaturage baba-Tigrayans bavuga ko akoresha imbaraga ze z’ubutegetsi mu gukora amavururura agamije kuvanaho burundu ibikorwa gakondo by’abanya Ethiopia bikaba umwihariko mu batuye agace ka Tigray.
Kwigumura kwa Tigray ku butegetsi bwa Abiy Ahmed byatangiye kuwa 5 Ukwakira 2020, aho abakuru b’imiryango ya Tigray bemeje ko bagomba gufata intwaro bagahangana n’ubutegetsi bubakandamiza bugamije kwikururira inyungu zose z’abanyagihugu. Aha aba Tigrayans batanga urugero rwa Minisitiri w’intebe Abiy Ahmed bavugako adakorera abatuye Ethioapia ahubwo yagiye ku butegetsi agamije gushimisha abazungu maze nabo bamwitura kumuhemba igihembo cy’Amahoro Cyitiriwe Nobel.
Kuva ku tariki ya 5 Ukwakira 2020, Ishyaka TPLF ryatangiye kwinjiza abagabo bose bafite imbaraga n’urubyiruko mu gisirikare hagamijwe gukuraho ubutegetsi no kugarura ubureganzira bwabo bivugwako bugererewe na Guverinoma iyobowe na Dr. Abiy Ahmed. Kugeza uyu munsi Aba-Tigrayans bafite intwaro bamaze kugera ku 250,000 umubare umuryango w’Abibumbye wemezako uruta kure abasirikare b’igihugu cya Ethiopia ubateranije.
Ibikorwa by’urugomo n’intambara y’abaturage bikomeje kuba muri Ethiopia , bivugwa ko abaturage barenga amagana bamaze kubigwamo ,abenshi muri bo bakaba bacishijwe intwaro gakondo nk’imihoro , ibisongo n’amabuye.
Guverinoma ya Ethiopia iherutse gutangaza ko itazigera igirana ibiganiro n’aba Tigrayans , ahubwo ivuga ko izakoresha ingufu za gisirikare mu guhagarika urugomo rukomeje gukorwa n’ingabo z’ishyaka TPLF.
Ildephonse Dusabe
