Kuri uyu wa Mbere tariki 1 Gashyantare 2021 Seif Sharif Hamad, umwe mu bayobozi b’ibirwa bya Zanzibar yemeje ko yanduye Covid-19 anasaba abaturage kwirinda batitaye kubyo abayobozi babo bakuru batangariza isi ko nta covid-19 ibarizwa mu gihugu cyabo.
Bwana Hamad ni umuyobozi w’ishyaka (ACT-Wazalendo) muri Tanzania , gusa we n’ishyaka rye bakaba bariyemeje kwihuza n’ishyaka riri ku butegetsi Chama cha Mapinduzi nyuma y’amatora yo mu mwaka ushize hagamijwe ishyirwaho rya guverinoma y’ubumwe .
Binyuze mu butumwa bugufi yashyize ku mbugankoranyambaga akoresha, Hamad yagize ati: “Ni ukuri ndi mu bitaro bya Mnazi Mmoja aho ndimo kuvurirwa Covid-19 kandi umugore wanjye nawe yishyize mu kato mu rugo iwacu.”
The East African dukesha iyi nkuru yanditse ko Hamad Seif Sharif abaye umuntu wa mbere mu bavuga rikijyana muri Tanzania utangaje ko yanduye Covid-19 nyuma y’igihe gikabakaba umwaka Perezida John Magufuli atangaje ko muri iki gihugu nta coronavirus iharangwa.
Hamad Seif Sharif yakomeje gukangurira abaturage ba Tanzania kuva ku bihuha bitangazwa n’abayobozi bakirinda iyi ndwara cyane ko ngo aho muri Tanzania ikihagaragara nubwo babeshya ko itakiharangwa.
Kugeza ubu nta mibare yemewe igaragaza uko Covid-19 ihagaze muri Tanzania kuko guhera muri Mata 2020 iki gihugu cyatangaje ko nta Covid-19 ikiharangwa ndetse kinashyiraho itegeko ribuza ikwirakwizwa ry’amakuru kuri Covid-19 , aho ubikoze ayo makuru atnze afatwa nk’ibihuha agakurikiranwa n’ubutabera.
Mu minsi ishize , abayobozi bakuru barimo perezida w’igihugu, abayobozi b’uterere n’umuvugizi wa Guverinoma bavuze ko Covid-19 itakiba muri iki gihugu, ndetse Perezida Magufuli ubwe yavuze ko Tanzania itazigera ikoresha inkiko izo arizo zose zivuye mu bihugu byo mu burengerazuba bw’isi.Aho yahamije ko ngo abaturage ba Tanzania Atari imbeba zikorerwaho ubushakashatsi.
Ildephonse Dusabe
