Kiliziya Gatolika muri Tanzania yahishuye ko mu gihe cy’umwaka umwe byumwihariko mu byumweru 2 biheruka imaze gupfusha Abihayimana 85 bose bapfa bagaragaza ibimenyetso bya Covid-19.
Mu kiganiro Umunyamabanga mukuru w’inama nkuru y’Abepisikopi, muri iki gihugu Padiri Charles Katima yahaye itangazamakuru yavuze ko mu mwaka umwe kiliziya imaze gupfusha abapadiri 25 n’ababikira 60, kandi ngo bose bapfa bagaragaza ibimenyetso nk’ibya Covid-19.
Padiri Charles Katima yavuze ko adashobora kwemeza koko ko aba bihayimana Gatolika bishwe na Covid-19 kuko ngo muri bose ntawigeze apimwa icyorezo.
Katima yavuze ko Leta yirengagije kwita ku kugura ibikoresho byo gupima iki cyorezo nkana, nkaho yatanze urugero ko mu mavuriro n’ibitaro bigera kuri 500 Kiliziya Gatolika ifite muri gihugu hose nta na hamwe ushobora gusanga ibikoresho bipima Covid-19.
Ibi bibaye mu gihe Guverinoma ya Tanzania ibinyujije muri Minisitiri w’Ubuzima iherutse gutangaza ko nta mugambi ifite wo gutumiza inkingo mu gihe cya vuba.
Ishami ry’umuryango wabibumbyeryita ku buzima OMS ntirihwema gusaba iki gihugu kugaragaza imibare y’abandura n’abahitanwa n’iki cyorezo, nyamara Leta yo ikemeza ko muri iki gihugu nta Covid-19 ikihabarizwa. Ibi biniyongera ku kuba ibihugu byo mu karere Tanzania irimo byatangiye kwakira inkingo binyuze mu mushinga COVAX, mu gihe Tanzania yo ikigenda biguru ntege mu birebana no gutumiza inkingo no kuzikoresha.
