Tanzania yishimiye umuti wa Covid-Organics wakozwe n’igihugu cya Madagascar

Igihugu cya Tanzania kiratangaza ko kishimiye umuti cyahawe n’igihgu cya Madagascar. Minisitiri w’Ububanyi n’Amahanga muri Tanzania, Prof Palamagamba Kabudi yavuze ko inshingano za mbere zihari ari uko ugiye gutangira gukorwaho ubushakashatsi, ukagenzurwa mbere y’uko ukoreshwa n’abanyatanzania.

Perezida wa Madagascar Andry Rajoelina, yavuze ko uyu muti ukoze mu byatsi, uvura abarwayi ba COVID-19 bagakira neza. Yasabye abantu kwizera ubushobozi bw’igihugu cye, ndetse ko amafaranga yose azava mu bikorwa byo gucuruza uyu muti azashyirwa mu kigo cy’ubushakashatsi cya Malagasy.

Uyu muti gakondo uzwi nka Covid-Organics cyangwa CVO mu mpine ukozwe mu byatsi birimo n’ibyo mu bwoko bw’inyabarasanya n’ibindi byo muri Madagascar.

Minisitiri y’ububanyi n’amahanga ya Tanzania Prof Palamagamba Kabudi yatangaje ku rubuga rwa Instagram amafoto y’iryo hererekanya ry’uwo muti ndetse anagaragaza ibyishimo yakiranye uwo muti.

Umuyobozi wungirije ushinzwe muri OMS mu ishami rya Afurika rishinzwe gukumira impanuka mu kurwanya COVID-19, Dr Richard Mihigo yamaganye ibivugwa na Madagascar ko uwo muti yakoze ushobora kuvura abarwayi ba COVID-19, indwara y’ubuhumekero iterwa n’ubwoko bushya bwa Coronavirus.

Tanzania ni kimwe gusa mu bihugu byinshi byo ku mugabane w’Afurika byamaze gutumiza uwo muti cyangwa biteganya kuwutumiza. Ibyo bihugu birimo nka Repubulika ya Demokarasi ya Kongo, Guinea-Bissau, Equatorial Guinea na Liberia.