Guverinoma ya Leta Yunze Ubumwe ya Tanzania kuri uyu wa 3 Gicurasi 2021 yashyizeho amabwiriza yo kurwanya ikwirakwira ry’icyorezo cya Covid-19.
Nk’uko itangazo ryaturutse mu biro bya Minisiteri y’Ubuzima ribivuga, aya mabwiriza arebana no kwirinda ko ubwandu bushya bw’iki cyorezo bwagiye bugaragara mu bihugu bitandukanye, butagera muri Tanzania.
Iri tangazo rigira riti: “Hashingiwe ku buryo icyorezo gihagaze ku Isi n’uburyo ubwandu bushya bugenda buboneka, hari ibyago byinshi by’uko cyagera mu gihugu cyacu.”
Muri aya mabwiriza harimo ko: abinjiye muri Tanzania baba abenegihugu cyangwa abanyamahanga, bagomba kwerekana icyemezo cy’uko batanduye iki Covid-19.
Abinjira muri Tanzania baturutse mu bihugu birimo ubwandu bushya, kandi bazajya bapimwa iki cyorezo banashyirwe mu kato k’iminsi 14 biyishyurira.
Mu gihe kandi abinjira bazaba bageze mu gihugu, barasabwa kubahiriza amabwiriza yo kwirinda iki cyorezo arimo: kwambara agapfukamunwa, gukoresha umuti usukura intoki no guhana intera.
Guverinoma ya Tanzania yari imaze igihe kirekire idashyiraho amabwiriza yo kwirinda icyorezo cya Covid-19, aho ku butegetsi bwa Dr John Pombe Magufuli, yasabaga abaturage gukomeza ibikorwa byabo batikanga, kuko ngo “nta Covid yari mu gihugu”.
Magufuli kandi yari yarabwiye abaturage ko atari ngombwa gukurikiza amabwiriza y’ubwirinzi yashyizweho n’inzego mpuzamahanga z’ubuzima arimo: kwambara agapfukamunwa no guhana intera hagati y’umuntu n’undi, anashimangira ko igihugu cye kitazigera gifata inkingo z’iki cyorezo, ko ahubwo kizakoresha ubwirinzi gakondo.
Ariko nyuma y’igihe gito Perezida mushya, Samia Suluhu Hassan agiye ku butegetsi, yaciye amarenga ko ashobora gushyiraho aya mabwiriza. Mu minsi ishize, aherutse gushyiraho itsinda ry’impuguke, azishinga gukora ubushakashatsi ku miterere y’iki cyorezo mu gihugu.
Perezida Suluhu yavuze ko ikizava mu bushakashatsi bw’izi mpuguke ari cyo kizashingirwaho hafatwa ingamba zo kwirinda iki cyorezo.
