Ejo kuwa 28 Gicurasi 2023 ,Abafana bagera kuri 40 barakomeretse undi 1 ahasiga ubuzima, mu mukino wahuje Yanga na USM Alger , biturutse ku bwishi bw’abafana bari bitabiriye uyu mukino kuri Benjamin Mkapa Stadium mu marushanwa ya CAF confederation Cup.
Mbere y’uko Yanga yakira USM Alger ,byatangajwe ko amatike yo kwinjira muri Benjamin Mkapa Stadium isanzwe yakira abafana 60.000 yarangiye ku isoko.
Ibitangazamakuru bitandukanye byo muri Tanzania, byanditse ko mu gihe abafana bashakaga uko binjira muri stade, habaye umuvundo watumye babyigana umuntu 1 ahita ahasiga ubuzima abandi 40 barakomereka.
Iyi mpanuka ikimara kuba, hatangajwe abafana 30 bakomeretse byoroheje, gusa uko amasaha yagiye yigira imbere hagaragaye umuvundo ukomeye wavuyemo gukomereka gukabije kw’abandi bantu 10.
Abanyamakuru bakorera muri Tanzania, batangaje ko ahanini umuvundo waturutse ku bantu benshi bashakaga gucuruza amatike y’amahimbano ku muryango wa stade.
Amashusho ateye ubwoba agaragaza abafana bamwe bashaka kwinjirira ku mukino batishyuye, abandi barwana no guca mu ruzitiro ngo basubire hanze ya stade.
Ibi byashimangiwe n’umukorerabushake wa Croix Rouge wari ku kibuga ubwo izi mvururu zabaga.
Yakomeje avuga ko byari ibintu biteye ubwoba cyane kubona abari gusesera mu ruzitiro, abandi barufashwemo ndetse hari n’abari bari kurusimbuka kugeza ubwo polisi yatangiraga kubamishamo ibyuka biryana mu maso.
Ibyemezo byo kugarura umutekano ku kibuga, ntabwo byabujije umukino kuba kuko abafana ibihumbi bawukurikiranye ndetse ukarangira Yanga itsindiwe iwabo ibitego 2-1 na USM Alger.
Biteganyijwe ko umukino wo kwishyura uzabera muri Algeria ku wa 5 Kamena 2023 saa Tatu z’Ijoro.
Jessica Mukarutesi
