Perezida wa Tnzania Samia Suluhu Hassan yavuze ko Dr Philip Mpango ari we ugomba kuba visi perezida w’iki gihugu.
Uyu Dr Philip agomba kubanza kwemezwa n’inteko nshingamategeko nk’uko itegeko nshinga ryo muri kiriya gihugu ribiteganya.
Itegeko nshinga rya Tanzania rivuga ko Visi perezida mushya yemezwa ari uko atowe nibura na 50% by’abagize inteko nshingamategeko.
Dr Philip Mpango azaba asimbuye kuri uwo mwanya Mama Samia Suluhu Hassan warahiriye kuba perezida nyuma y’urupfu rw’uwari perezida Dr John Pombe Magufuli.
Dr Philip Mpango yari asanzwe ari Minisitiri w’Imari n’Igenamigambi wa Tanzaniya kuva mu mwaka wa 2015.
Mu bindi yakoze harimo kuba umuyobozi mukuru w’ikigo cy’imisoro n’amahoro cya Tanzaniya (TRA), Umunyamabanga mukuru mu biro bya perezida mu kanama gashinzwe igenamigambi, kuba umujyanama wa perezida mu by’ubukungu, umuyobozi mukuru ushinzwe ubukungu muri Banki y’Isi n’indi mirimo itandukanye.
