Ejo ku cyumweru isanduku y’umurambo wa Mkapa yazanywe n’abasirikare kuri stade Uhuru i Dar es Salaam ahabereye misa yo kumusezera
Mu muhango w’idini wo gusezera kuri Benjamini William Mkapa wahoze ari perezida wa Tanzania wabereye mu mujyi wa Dar es Salaam ejo ku cyumweru, umuryango we watangaje ko yapfuye bitunguranye azize umutima.
William, umwe mu bo mu muryango we wavuze muri uyu muhango yagize ati:
”Amaze kumva amakuru yarahagurutse ashaka nko kugenda ariko arongera aricara yubika umutwe, nyuma baje kureba uko ameze basanze yapfuye. Ni byiza ko tuvuga ibi kuko buri wese ku mbuga nkoranyambaga yatangiye kwigira inzobere”.
Urupfu rwe rwatangajwe na Perezida John Pome Magufuli mu ijoro rishyira kuwa gatanu w’icyumweru gishize, avuga ko yapfiriye mu bitaro bya Dar es Salaam aho yari yajyanywe kuvurwa.
Bwana Magufuli yavuze ko Bwana Mkapa yararimo avurirwa mu bitaro, ko amakuru arambuye ku rupfu rwe azavugwa nyuma.
Igitambo cya misa cyo kumusezeraho cyitabiriwe n’abantu batandukanye, abakuru ba kiliziya gatolika muri Tanzaniya bamushimiye ko yayiteje imbere muri iki gihugu.
Leta ya Tanzaniya yatangaje ko Benjamin William Mkapa azashyingurwa ku ivuko rye ahitwa Lupaso mu gace kitwa Mtwara mu majyepfo ya Tanzaniya.
Imihango yo kumusezera yatangiye ejo ku cyumweru ikazageza kuwa gatatu tariki 29 z’uku kwezi kwa karindwi.
Kassim Majaliwa, minisitiri w’intebe wa Tanzaniya yatangaje ko kuwa kabiri ariwo munsi Bwana Mkapa azasezerwaho ku rwego rw’igihugu.
Leta y’u Burundi yatangaje ko minisitiri w’intebe Alain Guillaume Bunyonyi, yafashe urugendo ajya muri Tanzaniya kwifatanya nabo ”gusezera no gushyingura” Bwana Mkapa.
Leta y’u Rwanda yatangaje ko ibendera ry’igihugu ryururutswa kugeza mu cya kabiri kuva uyu munsi kuwa mbere kugeza kuwa gatatu ”mu rwego rwo kunamira” Bwana Mkapa.
Imihango yo kumusezeraho ku rwego rw’igihugu nirangira kuwa kabiri, nibwo umubiri we uzajyanwa gushyingurwa ku ivuko, nk’uko leta ya Tanzaniya ibivuga.
Bwana Majaliwa yabwiye abanyamakuru ko umubiri wa Mkapa, wari ufite imyaka 81, uzashyingurwa kuwa gatatu tariki 29 z’uku kwezi.
Ndacyayisenga Jerome
