Abaturage bo muri Tchad kuri iki Cyumweru bazindukiye mu matora ya Perezida yitezweho gusiga Perezida Idriss Deby Itno atorewe manda ya gatandatu.
Deby w’imyaka 68 amaze imyaka irenga 30 ku butegetsi yagiyeho akuyeho ubwari buriho hifashishijwe ingufu za gisirikare.
Muri ayo matora Derby ahanganye n’abatavuga rumwe na Leta barindwi nubwo nta mahirwe menshi bahabwa.
Africa News yatangaje ko amatora yatangiye saa moya za mu gitondo, aho abanya-Tchad basaga miliyoni 7.4 aribo biteganyijwe ko bayitabira.
Mu mwaka wa 2018, Deby yahinduye Itegeko Nshinga rimwemerera kwiyamamariza kuyobora Tchad kugeza mu 2033.
Mu bandi bahanganye mu matora harimo Albert Pahimi Padacke wahoze ari Minisitiri w’Intebe, Felix Nialbe Romadoumngar mushya muri politiki. Hari kandi Lydie Beassemda w’imyaka 54, umugore wa mbere wiyamamaje mu matora ya Perezida wa Tchad.
