Guverinoma ya Repubulika Iharanira Demokarasi ya Congo, yatangaje ko Perezida Felix Tshisekedi azitabira irahira rya mugenzi we wa William Ruto uherutse gutorerwa kuyobora Igihugu cya Kenya, uzarahira kuri uyu wa Kabiri tariki 13 Nzeri 2022.
Iri rahira rya Perezida mushya wa Kenya, William Ruto, ritegerejwemo abakuru b’Ibihugu 20 barimo n’abayobora Ibihugu bibana n’iki Gihugu mu Muryango wa Afurika y’Iburasirazuba.
Perezida Tshisekedi Felix na we ari mu bazitabira uyu muhango nkuko byatangajwe na Perezidansi ya Congo, aho bavuze ko ku munsi w’ejo tariki 13 Nzeri Perezida azaba ari muri Kenya yitabiriye imihango y’irahira rya mugenzi we William Ruto watorewe kuyobora Kenya.
Iyi mihango ibaye nyuma y’uko urukiko rw’ikirenga rwemeje ko William Ruto ari we watsinze amatora nyuma y’ikirego mugenzi we Raila Odinga yagejeje mu rukiko avuga ko amajwi yabayemo uburiganya, ariko bikarangira urukiko rwemeje ko William Ruto ariwe watsinze amatora.
Uwineza Adeline
