Mu muhango w’irahira ry’abagize guverinoma nshya wabereye i Dodoma muri Tanzania, Perezida John Pombe Magufuri yabujije abagize guverinoma guhererekanya ubutumwa bw’amabanga y’akazi kuri Whatsapp anirukana Minisitiri wananiwe indahiro imwinjiza mu kazi.
Muri uyu muhango Perezida Magufuli yanaburiye abaminisitiri kwirinda kwifata amafoto kuri telefone zabo zigezweho azwi nka “selfies”mu gihe bari mu kazi, avuga ko akazi kabo “kazagaragarira” mu bikorwa bagezeho
Umuvugizi wa Perezida Magufuli asubiramo amagambo ya nyirubwite yagize ati”Muri guverinoma ubu hasigaye hari indwara idasanzwe aho n’amatangazo ya leta ashyirwa mu matsinda [groups] yo kuri WhatsApp. Amatangazo y’ibanga arimo kumenwa. Mureke dukurikize indahiro zacu”.
Perezida yirukanye Minisitiri wananiwe indahiro
Muri uyu muhango kando Perezida Magufuli Joseph yirukanye Depite Francis Ndulane wari wagenewe umwanya muri guverinoma nyuma yo kunanirwa indahiro ya Nyuma imwinjiza mu kazi.
Francis Ndulane yagombaga kuba Minisitiri wungirije ushinzwe ubucukuzi bw’amabuye y’agaciro, nyuma yokugerageza indahiro kenshi ikamunanira, Magufuli yafashe umwanzuro wo kumukura kuri uwo mwanya aho yavuzeko azawushakira undi uwukwiye.Yagize ati” Uyu mwanya nzawuha umuntu ushobora kurahira neza indahiro ye bikwiye”
Mu kwezi kwa cumi ni bwo John Pombe Magufuli yongeye gutorwa ku bwiganze bw’amajwi 86% mu matora abatavuga rumwe n’ubutegetsi bavuze ko yaranzwe n’uburiganya.
