Impuzamashyirahamwe y’umupira w’amaguru muri Afurika, CAF, yanze ubusabe bw’ishyirahamwe ry’umupira w’amaguru mu Rwanda, FERWAFA, bwo kwemera ko abafana bake bazajya muri sitade ubwo ikipe y’igihugu izwi nk’Amavubi izaba yakira iya Kenya izwi nka Harambee Stars mu majonjora yo gushaka itike y’irushanwa ry’igikombe cy’Isi rizabera muri Qatar mu 2022.
FERWAFA mu itangazo isohoye mu kanya gashize yatangaje ko yandikiye CAF iyisaba ko abafana bake bazitabira uyu mukino, ariko iyi mpuzamashyirahamwe ishingiye ku mabwiriza agenga imitegurire y’iyi mikino n’amabwiriza yo kwirinda icyorezo cya Covid-19, yavuze ko iyi mikino igomba kuba “nta bafana bahari”.
FERWAFA yakomeje ivuga ko CAF yakoze isesengura ku buryo bwo kubahiriza ingamba zo gukumira icyorezo cya Covid-19 no ku miterere ya sitade izakinirwaho uyu mukino, iti: “igaragaza ko ubusabe bwa FERWAFA bwo kwemererwa abafana mu kibuga…butemewe.”
Uyu mukino uzahuza Amavubi na Harambee Stars uzabera kuri sitade ya Kigali, i Nyamirambo tariki ya 5 Nzeri 2021. Uzaba ukurikiye uw’iyi kipe yatsindiwemo na Mali igitego 1-0, wabaye kuri uyu wa 1 Nzeri.
Minisiteri ya Siporo n’izindi nzego za Leta zari zaremeye ko uyu mukino witabirwa n’abafana bake, kikaba ari cyo cyemezo FERWAFA yashingiyeho isaba CAF uburenganzira.
