U Rwanda rugiye kwakira imikino Nyafurika ya Volleyball ihurirwamo nibihugu bya CAVB ZONE uy’umukino ukazatangira ku wa 6 kugeza ku ya 19 Ugushyingo, iri rushanwa rihuza amakipe abarizwa mu karere ka gatanu,iri rushanwa rikaba rimaze imyaka ine ritaba.
CAVB Zone V Club Championship, ni irushanwa rihuza amakipe y’imbere mu gihugu yitwaye neza, mu bihugu byose bibarizwa mu gice cy’iburasirazuba cy’ Afurika
Mu ibaruwa ubuyobozi bwa CAVB ZONE V bwandikiye amashyirahamwe y’ibihugu bibarizwa muri uyu muryango, harimo ko kuri iyi nshuro iri rushanwa ubundi ryitabirwaga n’amakipe y’abagabo, hamaze kongerwamo n’abagore ku nshuro ya mbere kuva ryakwemezwa.
Nk’uko bigaragara muri ubu butumire, bwashyikirijwe amashyirahamwe y’umukino wa volleyball yo muri aka karere ka gatanu, biteganyijwe ko hazabanza imikino y’abagore aho igomba kuzatangira ku itariki ya 6 kugeza ku ya 13 Ugushyingo 2023.
Nyuma yo gusoza ku ruhande rw’abagore, hazahita hakurikiraho iy’abagabo yo izatangira tariki 12 ikageza ku ya 19 Ugushyingo 2023, iyi mikino yose ikazabera mu nyubako y’imikino ya BK ARENA.
Nk’uko amabwiriza y’iri rushanwa abigena, igihugu gishobora guhagararirwa n’ikipe irenze imwe bijyanye n’uko yitwaye imbere mu gihugu.
Ubusanzwe akarere ka gatanu muri volleyball, kabarizwamo ibihugu 12 byose hamwe.
Ubwo iri rushanwa riheruka kuba muri 2019, ryabereye i Kigali mu Rwanda aho ryari ryitabiriwe n’amakipe 12, aturutse mu bihugu 5 aribyo u Burundi, Uganda, Ethiopia, Tanzania n’u Rwanda, aho ryaje kwegukanwa n’ikipe ya Gisagara Volleyball Club, itsinze REG VC amaseti 3-1, imikino yabereye muri Petit Stade Remera.
UMUTESI Jessica
