Minisiteri y’ubuzima yatangaje ko robo eshanu zigiye gutangira gukora mu bigo bikurikirana abarwayi ba Covid-19 mu Rwanda zakiriwe uyu munsi .
Akazuba, Ikirezi, Mwiza, Ngabo na Urumuri ni yo mazina y’izi ‘robots’ zizakora mu gupima umuriro, guha abarwayi ibyo bakenera no kubika amakuru y’abarwayi ba Covid-19.
Ibi bikoresho by’ikoranabuhanga minisiteri y’ubuzima ivuga ko bifite ubushobozi bwo gupima abantu hagati ya 50 na 150 mu munota umwe,bikaba bishobora gusimbura abantu mu mirimo imwe n’imwe.
Minsitiri w’ubuzima Dr Daniel Ndamije yagize ati: “Izi ‘robots’ zizafasha abaganga gufata ibipimo bimwe, gutanga ibiryo n’imiti ku barwayi bari muri ibyo bigo n’ibindi.Zishobora kandi kubwira abakozi bari ku kazi aho zibonye ibipimo bidasanzwe ku murwayi.”
Izi robots kandi zikora n’ibindi birimo kuburira umuntu wambaye nabi agapfukamunwa, no guhuza umuganga n’umurwayi mu buryo bw’iyakure bwa ‘video conference’.
Minisiteri y’ubuzima ivuga kandi ko undi mumaro ukomeye w’izi ‘robots’ ari ukugabanyiriza abaganga ibyago byo kwandura Covid-19 zibarinda guhura kenshi n’abarwayi.
Izi robots zizafasha kandi mu kubika amakuru y’abarwayi ku nyandiko abikwe mu buryo bugezweho no kwihutisha igihe byafataga gukora imirimo imwe n’imwe.
Mu cyumweru gishize, minisiteri y’ubuzima mu Rwanda yatangaje ko hari abaganga bamaze gutozwa gukorana n’izi ‘robots’, ubu zazanwe ari eshanu.
Mu Rwanda hamaze kuboneka abantu 308 banduye Covid-19 muri bo 209 barayikize nk’uko bivugwa na minisiteri y’ubuzima.
Agaciro k’izi ‘robots’ zikorwa n’uruganda rw’Ababiligi rwitwa Zorabots ntikatangajwe.
UMUKOBWA Aisha
