Impuguke mu buvuzi bushingiye ku muco Rutangarwamaboko yifatiye ku gahanga abategura irushanwa ry’ubwiza mu bagabo Mr Rwanda aho anenga abaritegura gufatirana ubukene buri mu rubyiruko bakabakoresha ibyo yise ibidakorwa.
Ni kenshi Rutangarwamaboko yumvikanye ku mugaragaro anenga abategura amarushinwa y’ubwiza avuga ko atari iby’i Rwanda.
Kuri uyu wa Gatanu tariki ya 1 Mata 2022 abinyujije ku rubuga rwe rwa Twitter yavuze ko abategura Mr Rwanda bafatiranye ubukene abaryitabiriye bafite bakabashukisha amafaranga n’ibindi bihembo kugirango babakoreshe ibidakorwa.
Yagize ati” U Rwanda si urwo Kugwiza Inkorabusa! Nimusigeho gufatirana utwana tw’udusore dushonje aho kutwigisha umurimo wadukiza inzara ukadushora mu kwimaringa ngo ejo tuzasarura ubukungu, witwaje u Rwanda! Njye Imandwa Nkuru y’u Rwanda kandi nkaba Umupfumu Mukuru mu Bicumbi ndareba mu Ndagu ngasanga ari ubukunguzi gusa”
Rutangarwamaboko akomeza avuga ko akaburiye mu isiza katabonekera mu isakara. Ati”Ibizima bya nyampinga w’i Rwanda byazimiriye muri cya cyiswe ‘Miss Rwanda’ ibindi bitari ibizambya ni ibiki tuzabonera muri ibi byitwa ngo ni ‘Mister Rwanda’ atari ukwibyindi kandi abantu batabura kwibeshya gusa ngo baribyindura….?”
Si Rutangarwamaboko gusa unenze abategura n’abitabira Mister Rwanda, kuko hari abandi benshi mu byamamare bagaragaje ko bidakwiye kubona umusore wakabaye akora ibimuteza imbere , yirirwa yimaringa imbere y’abantu agamije kuronka ubutunzi burimo imodoka ihatanirwa n’uzegukana iri rushanwa.
Muri aba kandi harimo uhanzi Semivumbi Daniel uzwi nka Danny Vumbi, we wavuze ko ubwiza bw’umusore butagaragarira muri biriya bita amarushanwa ahubwo ibitekerezo n’umubare w’ibyo atunze aribyo bimugira uw’igikundiro muri rubanda.
