Ubucukumbuzi:Ninde ufite uburyozwe k’urupfu rw’abanyapolitiki b’iGitarama

Abahoze mu butegetsi bwa Perezida Geregori Kayibanda ndetse n’ubwa Habyarimana Juvenal bakomeje kwitana bamwana, k’urupfu rw’agashinyaguro, rwakorewe abahoze muri Guverinoma ya Perezida Kayibanda waje guhirikwa n’umuhungu yabyaye mu batisimu Jenerali Habyarimana Juvenal,bamwe bashinguwe mu rwobo rwa Bayanga,Nyamagumba iMUsanze n’ahitwa mu Kagohe muri Nyabihu.

Mu kiganiro kimaze iminsi gihita kuri Radiyo ijwi ry’Amerika cyitwa murisanga kw’ijwi ry’Amerika,ikiganiro kimaze iminsi gikurikiranwa n’abantu benshi cyane muri iyi minsi, kuberako benshi bari bafite amatsiko y’uburyo abantu basaga 62 bari bakomeye, muri Guverinoma ya Kayibanda biciwe muri Gereza ya Ruhengeri n’iya Gisenyi ,imiryango yabo ntihabwe ubutabera ndetse ngo babe babashyingura no mu cyubahiro.

Muri iki kiganiro hatumiwe inzego zari ziriho muri icyo gihe twavuga nka Col Serubuga Laurent wabaye Umuyobozi wa Etamajoro,Col Biseruka Stanisilasi wari ukuriye ingabo muri Perefegitura ya Ruhengeri,Hakizimana Alphonse wari Umukozi mu biro by’iperereza RWASIR wivugira ko ariwe wakomye imbarutso ya Kudeta,Zigiranyirazo Protais wari Perefe wa Ruhengeri abakozi muri za Minisiteri n’abandi,muri bose nta n’umwe utanga umurongo usobanutse w’infu z’abo bantu.

Benshi mu bakurikiranye iki kiganiro, ntibasiba kunenga umwifato wa Col Serubuga wari Shefu wa etamajoro wungirije udashaka kuvugisha ukuri ku byabaye,ngo afashe abantu kubohoka, mu gihe benshi bamutunga agatoki ko ariwe na Habyarimana Juvenal bagiye batanga amategeko yo kwica aba bantu bifashishije Sembagare wari Umuyobozi wa Gereza ya Ruhengeri.

Mu batumirwa b’iki kiganiro Col Biseruka, we ntiyatinye kwegeka ubu bwicanyi kuri Leta ya Habyarimana,avugako n’urubanza rwitiriwe Lizinde na bagenzi harimo na Col Biseruka wari Komanda icyo gihe, bashinjwaga kugambirira guhirika ubutegetsi bwa Habyarimana Juvenal,bwari uburyo bwo kugirango iyo Leta yikure mw’isoni kuko yageze naho itanga impozamarira ku miryango y’abanyakwigendera.

N’ubwo bimeze bityo Col Serubuga we byose abishyira kuri Majoro Lizinde wari ushinzwe ibiro by’iperereza ko ariwe wabishe Perezida Habyarimana atabizi,ariko abasesenguzi basanga ari ukwigiza nkana kuko bagambiriye kubyegeka kuri Lizinde utakiri kw’isi,ariko Nyakwigendera Lizinde igitabo yapfuye yanditse cyambika ubusa Col Serubuga na bagenzi be,bityo kandi bariya banyapolitiki s’abantu bari borohoje k’uburyo bakwicwa Perezida atabizi.

Mwizerwa Ally