Mu rubanza ruregwamo Uwihoreye Jean Bosco uzwi nka Ndimbati, uregwa ibyaha birimo gusambanya umwana abanje kumusindisha, Ubushinjacyaha bwasabye ko uyu mugabo ahanishwa gufungwa imyaka 25.
Mu gitondo cyo kuri uyu wa Kabiri, ni bwo Ndimbati yaburanye mu mizi mu rubanza aburanama n’ubushinjacyaha ku byaha aregwa birimo gusindisha umwana no gusambanya umwana.
Ndimbati utagaragaye ku cyicaro cy’urukiko rwisumbuye rwa Nyarugenge giherereye i Nyamirambo, yaburanye ari kuri gereza hifashishijwe ikoranabuhanga.
Ubushinjacyaha bwasobanuye ibyaha burega Ndimbati, bwavuze ko umukobwa wasambanyijwe n’uyu mugabo yari yasabye Ndimbati kumufasha kuzinjira mu byo gukina Film.
Bwavuze ko tariki 24 Ukuboza 2019, Ndimbati yagiye kureba uwo mukobwa, akagenda yitwaje inzoga isindisha (Amarura) akamubeshya ko ari amata, akamuha ngo asomeho, ikamusindisha bikarangira amusambanyirije muri lodge yari yamujyanyemo.
Ubushinjacyaha bwavuze ko ibimenyetso byagaragajwe ndetse n’ubuhamya, bishimangira ko Ndimbati yakoze ibyaha akurikiranyweho, busaba Urukiko Rwisumbuye rwa Nyarugenge kuzamuhamya ibyaha ubundi rukamukatira gufungwa imyaka 25.
Ndimbati yisobanuye avuga ko adahakana ko yaryamanye n’uyu mukobwa ariko ko itariki yavuzwe ko baryamaniyeho atari yo kuko baryamanye ku ya 02 Mutarama 2020 mu gihe iriya ya 24 Ukuboza 2019 atari ari no muri Kigali.
Yavuze kandi ko ibivugwa ko uyu mukobwa yavutse muri Kamena 2002 atari byo ahubwo ko ibyangombwa bye bigaragaza ko yavutse tariki 01 Mutarama 2002.
Ndimbati yongeye kuvuga ko ibyamubayeho ari akagambane kuko hari abashutse uwo mukobwa akekwaho gusambanya bakamubwira ko agomba kumwaka Miliyoni 5 Frw ndetse akamushyiraho n’andi mananiza.
Yavuze kandi ko umunyamakuru wamukoresheje interview na we yamuhamagaye akamusaba miliyoni 2 Frw akamukangisha ko natayamaha azamushyira hanze.
Yavuze ko ibi byose ari umugambi w’abashatse kumufungisha kandi ko bawucuze bifashishije uyu mukobwa yateye Inda.
Urukiko rwemeje ko uru rubanza rwo mu mizi rupfundikiye, rufata umwanzuro ko ruzasoma icyemezo cyarwo tariki 29/09/2022.
RWANDATRIBUNE.COM
