Leta y’u Bushinwa yategetse imijyi mito kureka kubaka inyubako ndende zimaze kuba ikirango cy’iki gihugu kuko hari aho usanga ntacyo ikoreshwa.
U Bushinwa bumaze iminsi kandi bukumira abantu bakora imishinga yo kwemeza amaso, mu gihe ubusanzwe ugenzuye neza wasanga idakenewe.Ubushinwa bwategetse imijyi mito kutongera kubaka “imiturirwa miremire cyane”, nk’umwe mu migambi migari yo kurwanya imishinga y’imburamumaro.
Imijyi ifite abaturage bari munsi ya miliyoni eshatu, yategetswe kutubaka inzu zirengeje metero 150 z’uburebure.
Naho imijyi irengeje abo baturage izasabwa kubaka inzu zitarengeje metero 250. Ubusanzwe muri iki gihugu hari itegeko ry’uko inzu zirengeje metero 500 zitemewe.
Amakuru atangwa n’inzego z’iki gihugu avuga ko inyubako ndende zikenewe mu mijyi ituwe cyane nka Shanghai na Shenzhen, naho mu yindi mijyi yo nta kibazo cy’ubutaka kiriyo ku buryo hakenerwa bene izo nzu.
Mu Bushinwa ni hamwe mu hantu haba inzu ndende cyane ku isi – zirimo Shangai Tower ireshya na 632m cyangwa Ping An Finance Centre i Shenzhen ya 599m.
Ibinyamakuru byaho bivuga ko mu gihe inzu ndende gutyo zikenerwa mu mujyi ibamo abantu benshi nka Shangai na Shenzhen, nta bukene bw’ubutaka buri mu yindi mijyi, ko inzu ndende zihubakwa byo kwirata ubukire gusa.
Mu ntangiriro z’uyu mwaka, hagaragaye amashusho y’abantu amagana bahunga bava mu nyubako ya 350m ya SEG Plaza iri mu mujyi wa Shenzhen – ubwo yari itangiye kunyeganyega.
Ubushinwa bwongereye gahunda yo kurwanya imishinga irenze yo kurata ubukire, abategetsi banenga abubatsi gukunda cyane kubaka inyubako zikurura ijisho.
Mu ntangiriro z’uyu mwaka iki gihugu cyasohoye itegeko ryo guca “ubwubatsi bubi”.
Zhang Shangwu wo muri koleji ya Architecture and Urban Planning ya Tongji University mbere yabwiye ikinyamakuru South China Morning Post ko abantu batwawe cyane no gushaka kubaka “ikintu kizajya mu mateka”.
Ati : “Buri nyubako yose irashaka kuba ikirango, abubatsi n’abakora igenamigambi barashaka kubigeraho bakora ibintu bidasanzwe.”
Itangazo rihuriweho ryo ku wa kabiri, ministeri ishinzwe imyubakire na minisiteri y’ibiza, zavuze ko irengayobora ridasanzwe rigomba kubanza gusabwa niba hari ushaka kubaka inzu irengeje 150m z’uburebure mu mujyi w’abantu batagera kuri miliyoni eshatu.
Gusa rikavuga ko nta mpamvu n’imwe ishobora gutuma aho hantu hubakwa irengeje 250m z’uburebure.
Gutyo kandi, no mu mijyi irengeje miliyoni eshatu z’abaturage gusaba irengayobora ryo kubaka inzu irengeje 250m biremewe, ariko ntibishoboka ku nzu irengeje 500m z’uburebure.
Iryo tangazo ryongeraho ko abategetsi bemeza irengayobora ku mategeko yashyizweho bazabibazwa “igihe cyose cy’ubuzima”.
Iri tangazo ryakiriwe neza na benshi bakoresha urubuga nkoranyambaga rwa Weibo, bamwe bavuze ko bene iyo miturirwa imena ibicu “idacyenewe… ari umwirato gusa”.
