Perezidawa Uganda Yoweri Kaguta Museveni yatangaje ko amashuri yose na za kaminuza, insengero n’imisigiti bigomba gufungwa mu gihe cy’iminsi 42 kubera ubwiyongere bwinshi bw’imibare y’abandura COVID 19.
Gufunga bikaba byatangiye kuri uyu wa mbere tariki ya 7 Kamena 2021, nyuma y’amabwiriza yatangajwe kuri iki cyumweru na perezida Museveni.
Uretse ibyo kandi yanatangaje ko n’ingendo rusange zaba iza bisi na moto bihuza uturere bigomba gufungwa iminsi 42, ariko byo bigatangira tariki ya 10 Kamena, kugira ngo abana bari ku mashuri babanze bagere iwabo.
Perezida Museveni yagize ati ” Imiterere y’ubwandu mu gihugu yarahindutse, ku buryo nko ku wa 4 Kamena 2021 hatangajwe umubare munini w’abanduye COVID-19 kurusha ikindi gihe mu munsi umwe ungana n’abantu 1259″.
Avuga ko igiteye inkeke kuri uwo mubare ari uko hari hafashwe ibipimo 7424, bivuze ko ujanisha ku bandura ari 17%.
Ati ” Nko mu mujyi wa Kampala ku munsi hari kuboneka abanduye basaga 500, mu gihe mu turere twa Wakiso na Gulu ku munsi haboneka abanduye barenga 100″.
Perezida Museveni yavuze ko iyi mibare yazamutse cyane kubera ko abantu badohotse ku ku mabwiriza yo kwirinda COVID-19, n’icyiciro gishya cy’ubwandu kirimo kugaragara mu mashuri guhera muri Werurwe 2021.
Ati “Abantu 948 ni bo byatangajwe ko banduye mu mashuri 43 yo mu turere 22. Uturere twa Kampala, Gulu, Masaka na Oyam twihariye 61% by’ubwandu bwabonetse mu mashuri na za kaminuza. Duhamya ko imibare igomba kuba irenze iriya, kubera ko amashuri menshi adatangaza imibare y’abanduye.”
Ibyo byose ngo biterwa n’uko amashuri atubahiriza ingamba zo kwirinda COVID-19, kuba adafite ibikoresho by’isuku bihagije, ubucucike mu mashuri no kuba amwe adakurikirana ibimenyetso bigaragazwa n’abana igihe bamaze kwandura.
Yemeza ko ubwandu bwazamuwe na coronavirus yihinduranyije, imaze gusangwa mu bantu 126 binjiye mu gihugu.
Nyuma yo gufunga amashuri, Museveni yatangaje ko abarimu bazongera kwemererwa gusubira ku mashuri ari uko bamaze gukingirwa COVID-19.
Hahagaritswe kandi inama zose zaba n’iza, uretse inama y’abaminisitiri, inteko ishinga amategeko n’ubucamanza.
Gusa nk’imihango y’ubukwe yo izakomeza, ikitabirwa n’abantu batarenga 20. Ni nawo mubare uteganywa ku bitabira ikiliyo no gushyingura, kandi bose bagomba kuba bambaye udupfukamunwa ndetse bagahana intera.
Amasoko manini arema buri cyumweru atari ay’ibiribwa nayo yafunzwe iminsi 42. Ibikorwa bisanzwe by’ubucuruzi bigomba gufungwa saa moya z’ijoro.
Kuri ubu muri Uganda abamaze kwandura COVID-19 bangana na 52,929, ikaba imaze kwica 374.
Harabarurwa abantu 9442 bagifite Coronavirus, barimo 634 barwaye. Bo bagizwe na 277 bakomerewe na 37 barembye cyane.
Abamaze gukingirwa muri Uganda ni abantu 748,676. Barimo 712.681 babonye urukingo rwa mbere na 35.995 babonye ebyiri za AstraZeneca.
Leta yiyemeje gukingira abantu miliyoni 21.9, ihereye ku bantu miliyoni 4.8 bafite ibyago byinshi byo kwandura no kuzahazwa n’indwara.
