Urukiko rukuru rwo muri Uganda rwakatiye umugabo w’imyaka 24 gufungwa imyaka itandatu kubera amagambo yo gutuka Perezida Museveni n’umuryango we yanyujije muri Videwo yatangaje ku rubuga nkoranyambaga rwa TikTok.
Edward Awebwa wavutse nyuma y’imyaka 14 Perezida Museveni agiye ku butegetsi kuko yafashe ubutegetsi 1986, yarezwe gukoresha imvugo y’urwango no gukwirakwiza “amakuru ayobya ndetse aharabika” Perezida Yoweri Kaguta Museveni wa Uganda n’ umugore we Janet Museveni hamwe n’umuhungu wa bo Muhoozi Kainerugaba, akaba ari n’umugaba mukuru w’ingabo.
Awebwa waburanye yemera icyaha ndetse akanagisabira imbabazi urukiko rwumvise abatangabuhamya bavuga ko yatangaje amakuru yo gutukana ndetse akavuga ko hazabaho kuzamura imisoro ku butegetsi bwa Perezida Museveni ibintu urukiko rwagaragaje nk’ibihuha yakwirakwije mu gihugu ku bushake.
Umucamanza ukuriye iburanisha yavuze ko nubwo yari yasabye imbabazi, yagaragaje ko aticuza ibikorwa bye, ndetse ko amagambo yakoresheje muri Videwo yari “nyandagazi cyane”.
Umucamanza Stella Maris Amabilis yagize ati: “Uregwa akwiye igihano kizatuma yigira ku hahise he kugira ngo ubutaha azubahe Perezida, umugore wa Perezida n’umuhungu wa Perezida.” Ibi bikaba byatumye akatirwa gufungwa imyaka itandatu kuri buri kirego mu birego bine ashinjwa ndetse akaba yiteguye kuryizwa byose icyarimwe.
Mu 2022, umwanditsi watsindiye ibihembo w’Umunya-Uganda, Kakwenza Rukirabashaija, yarezwe ibirego bibiri by’ imvugo itukana, nyuma y’amagambo adashimishije yavuze kuri Perezida no ku muhungu we kuri Twitter, ubu isigaye yitwa X, Ibi byatumye ahungira mu Budage nyuma yo gufungwa ukwezi kose aho yavuze ko yakorewe iyicarubozo igihe yari afunze.
Impirimbanyi akaba n’umwanditsi Stella Nyanzi, na we kuri ubu uba mu buhungiro, yahunze nyuma y’ uko afunzwe bitewe n’ umuvugo yashyize hanze wari wiganjemo amagambo anenga ubutegetsi bwa Perezida Museveni.
Mu 2022, Museveni yashyize umukono ku itegeko ryo guhashya imvugo y’urwango. Imiryango iharanira uburenganzira bwa muntu yararinenze cyane ivuga ko rigamije guhagarika ubwisanzure bwo kuvuga icyo umuntu atekereza ku mbuga za internet.
Mu mwaka ushize, urukiko rushinzwe kurinda iremezo ry’itegekonshinga rwanzuye ko igika cyo mu itegeko rihana “imvugo itukana” kinyuranyije n’itegekonshinga. Umunyamategeko ku burenganzira bwa muntu w’Umunya-Uganda, Michael Aboneka, yavuze ko Awebwa yarezwe hashingiwe kuri iryo tegeko ryagutse, avuga ko abanyamategeko bagihatana na ryo mu rukiko kuko ridasobanutse.
Rwandatribune.com
