Kuwa 28 Nzeri 2021 ikibuga cy’indege cya Uganda, Entebbe International Airport, cyibasiwe n’umwijima ubuzima burahagarara biturutse ku ibura ry’amashanyarazi ryamaze umwanya utari muto indege zimwe zihera mu kirere izindi zitinda guhaguruka na serivisi zose zirahagarara , iki kibuga abagikoresha bavuga ko gikunze kubaho udushya mu gihe ubusanzwe abantu benshi baziko ku bibuga by’indege ari ho hantu haba serivise zihuze kandi zubahirizwa ku gihe.
Ubwo iki kibuga cy’indege cya Uganda kibasirwaga n’umwijima indege ya Uganda yari iturutse i Kinshasa muri Repebulika iharanira Demokarasi ya Kongo yamaze hafi isaha mu kirere yabuze uko igwa , kimwe n’iya Qatar Airways yishe amasaha yari buhagurukireho ikamara amasaha atatu yose itaragenda.
Muri iki kibazo ikigo Gishinzwe iby’Indege za Gisivili muri Uganda UCAA cyatangarije Daily Monitor dukesha iyi nkuru ko uburyo bw’itumanaho bwa e-mail butagize ikibazo nyamara ngo byari ikinyoma kuko nabwo bari bwahagaze.
Vianney Luggya ni Umuvugizi w’iki kigo, yavuze ko imvano yo kubura uyu muriro ugatuma ikibuga cy’indege cya Uganda cyibasirwa n’umwijima byatewe n’insinga z’amashanyarazi ziri munsi y’ubutaka zirimo izitanga umuriro ku kibuga cy’indege zari ziri guhindurwa bikaza guteza ikibazo.
Nubwo hatatangajwe igihombo cyatewe n’uyu mwijima wibasiye iki kibuga cy’indege cya Uganda ,Vianney Luggya yihanganishije abagizweho ingaruka n’iri bura ry’umuriro avuga ko bazirinda ko byakongera kubaho yemeza kandi ko nta gikuba cyacitse ku kuba izi ndenge zatinze guhaguruka cyangwa kugwa ngo kuko biba byitezwe ku bibuga by’indege binyuranye.
Ikibuga cy’indege cya Entebbe gikunze kubaho udushya tudasanzwe ibiheruka bya hafi bikaba byarabaye muri Gicurasi aho hafi y’ibigega bya Peterori biri ku kibuga hafashwe n’inkongi y’umuriro yatejwe n’igitembo gisohora iyo peteroli cyacomotse bitera impagarara.
Aliciah Habibi
