Polisi iravuga ko Charles Mutyabule yapfuye mu gihe ipikipiki yari ariho yagonganye n’imodoka igishakishwa ahitwa Mabira ku muhanda wa Jinja-Kampala.
Bobi Wine avuga ko mu gihe yari avuye mu kiganiro kuri radiyo imweikorera mu karere ka Jinja abapolisi bashatse kwirukana abyoboke b’ishyaka rye bari bamutegereye.
Uyu munyapolitike utavuga rumwe n’ubutegetsi bwa Perezida Yoweri Museveni sibwo bwa mbere ahangana n’inzego zishinjwe umutekano.
Abinyujije ku rubuga rwe rwa Twitter ejo ku wa gatandatu ku mugoroba, Bobi Wine yanditse ati: “Mu gitondo cy’uyu munsi, igihe navaga kuri radiyo i Jinja, polisi n’igisirikare byateje akavuyo ku banyagihugu bari batekanye barindiriye kundamutsa”.
“Umwe mu barwanashyaka banjye bakomeye, Charles Mutyabule, yagonzwe n’imodoka y’igisirikare abashinzwe umutekano barebera”.
Hagati aho, igipolisi cyo kimenyesha ko Mutyabula yagonzwe n’imodoka yari kumwe n’uyu mudepite, akaba yapfiriye mu bitaro aho yari yajyanwe ngo bamwiteho, nk’uko bivugwa n’ikinyamakuru Daily Monitor gisubiramo amagambo yavuzwe n’umuvugizi w’igipolisi cya Uganda.
Mu mpera z’iki cyumweru gishize, hari amakuru yanditswe n’ikinyamakuru East African kivuga ko uyu mu nyapolitike ahanganye na Perezida Museveni yari yatumiwe mu kiganiro kuri radio NBS FM habaye kugerageza kumusohora ku ngufu.
Umuyobozi w’iyi radio, Michael Muwanguzi, yabwiye ikinyamakuru Daily Monitor ko abapolisi benshi bari bakikije radiyo mbere y’uko Bobi Wine ahagera.
Bwana Muwanguzi yabwiye icyo kinyamakuru ati: “Abapolisi barinjiye mu cyumba cy’amakuru bakomeza muri studio yarimo umudepite Kyagulanyi ariko kubera ko umuryango wari ufunze neza ntibashoboye kumugeraho “.
Umuvugizi wa polisi Fred Enanga ahakana aya makuru yivuye inyuma, akavuga ko ahubwo abapolisi bari bashyizwe hanze kugira bacungire umutekano iyi ntumwa ya rubanda.
Yabwiye Daily Monitor ati: “Abapolisi bacu ntibinjiye mu nyubako z’iyi radiyo, bagumye hanze. Niyo wabaza uyoboye iyi radiyo nibwo buhamya yatanga. Kubera ko hari abagizi ba nabi bari bakikije iyi radiyo, twashakaga gusa gukora ibishoboka byose kugira ngo Bobi Wine asubire i Kampala nta kibi kimubayeho”.
Bobi Wine ni umwe mu banyapolitike bahanganye cyane bikomeye na Perezida Yoweri Museveni, aho yivugira ko yiteguye kumutsinda mu matora. Ibi bikaba bitazamworohera mu gihe abarwanashyaka be bakomeje guhangana n’abashinzwe umutekano.
Mu kwezi kwa mbere uyu mwaka, yarahagaritswe igiye yashakaga gukora kampanye yo kumenyekanisha imigabo n’imigambi yiwe mu matora ateganijwe mu 2021.
Mu myaka ishize, amatora yo muri Uganda yahoze agaragaramo kwigomeka ku gipolisi nacyo kigafunga abantu, harimo n’abanyepolitike.
Umukuru w’icyo gihugu Yoweri Museveni ari ku butegetsi imyaka 34 akaba ategereje kwongera kwiyamamaza iyindi manda.
Ndacyayisenga Jerome
