Itsinda rishinzwe kurwanya ruswa muri Perezidansi ya Uganda rikuriwe na Col Edith Nakalema ku bufatanye na Polisi y’iki gihugu, bataye muri yombi igikomangomakazi Nalinya Bwanga, umukobwa wa Kabaka wa Buganda, Ronald Muwenda Mutebi II.
Nalinya Bwanga akurikiranweho ibyaha birimo kwigwizaho umutungo wa Leta no gutwara ubutaka bw’abaturage ku ngufu.
Col Nakalema nk’uko ikinyamakuru Independent dukesha iyi nkuru cyabitangaje, yavuze ko uriya mukobwa wa Kabaka wa Buganda yabanje gufungirwa kuri Sitasiyo ya Polisi yo mu karere ka Luwero, mbere yo kujyanwa kuri Sitasiyo Nkuru ya Polisi y’i Kampala aho akomeje guhatirwa ibibazo.
Itabwa muri yombi rye ryakurikiye ibirego yari amaze iminsi ashinjwa birimo gutwara ku ngufu ubutaka bw’abaturage, kubababaza ndetse no kugira uruhare mu itabwa muri yombi abaturage babazaga impamvu banyagwa ubutaka bwabo.
Col Nakalema yavuze ko uretse guta muri yombi kiriya gikomangomakazi, banafashe abayobozi bamwe bo mu karere ka Hoima bazira gukodesha ibikoresho byo mu muhanda bya leta umuntu wikorera.
Ati: “Aba bayobozi bakodesheje mu buryo butemewe ibikoresho bya leta byo mu muhanda ku muhinzi wigenga mu mudugudu wa Kaduuhi, mu karere ka Kiryandongo. Ibi binyuranyije n’amabwiriza ya leta. Imbaraga rusange zizatanga umusaruro mu kurwanya ruswa.”
