Kuwa gatandatu tariki ya 24 Nyakanga 2021 mu gace ka Mutai kari mu mujyi wa Jinja, umupolisi yarashe umwana w’imyaka 16 nyuma yo gutabazwa ngo akize abaturage barimo kurwana yahagera bagatangira kumutera amabuye.
Ikinyamakuru Daily Monitor cyandikirwa muri iki gihugu cyatangaje ko uyu mwana wishwe ari uwitwa Nelson Nabugere usanzwe yiga ku ishuri rya Lwanda High School ryo mu mujyi wa Jinja.
Charles Isooba ubyara nyakwigendera yavuze ko yumvise amasasu ahagana sa tatu z’ijoro akajya hanze ari bwo yahise abwirwa ko umuhungu we amaze kuraswa na Polisi. Uyu musaza avuga ko yakomeje kubaza icyaba giteye umwana we kuraswa agahita atabwa muri yombi we na bagenzi be bajyanwe kuri Polisi nyuma bakaza kurekurwa.
Umuyobozi wa Polisi mu gace ka Kiira RPC Dauda Hiriga yemeje aya makuru y’urupfu rwa Nabugere.Yagize ati”Kuwa Gatandatu ahagana saa 9:45 mu gace ka Mutai , habaye imirwano abaturage biba ngombwa ko bahamagara polisi. Umupolisi wacu Musaidizi yahise atabara agezeyo abaturage baramwihinduka batangira kumutera amabuye.Mu rwego rwo kwirwanaho yahise atangira kurasa amasasu mu kirere nyuma tuza kumenya ko yafashe abantu 2 mubari aho barimo nyakwigendera Nabugere .
Umupolisi wakoze iki gikorwa yahise atabwa muri yombi, ndetse kuri uyu wa Mbere byitezwe ko arinabwo ashyikirizwa ubutabera”
