Urugereko rwisumbuye rw’Urukiko rw’Umuryango wa Afurika y’Iburasirazuba (EACJ), rwateye utwatsi ubusabwe bw’umunya-Uganda, Male Mabirizi, wari warasabye ko rutegeka ubutegetsi bwa Uganda guhagarika amatora y’umukuru w’igihugu azaba mu 2021.
Mu makuru dukesha Igihe.com avuga ko Mabirizi yavuze ko kuba harahinduwe Itegeko Nshinga bigatuma Perezida Museveni, azongera kwiyamamaza muri aya matora, byakozwe mu buryo bunyuranije n’itegeko.
Urukiko rw’Ikirenga rwa Uganda rwaharuriye inzira Perezida Museveni yo kongera kwiyamamaza mu 2021, ni nyuma yo gutesha agaciro ubusabe bw’abashaka ko ingingo y’Itegeko Nshinga, ivuga ko urengeje imyaka 75 y’amavuko atemerewe kwiyamamariza kuyobora igihugu igumaho.
Abacamanza bavuze ko nyuma yo gusuzuma no kubitorera basanze ku ‘bwiganze bw’abacamanza bane batoye bashyigikira ko iyo ngingo iva mu Itegeko Nshinga, mu gihe batatu batoye bavuga ko itakorwaho ariko ubuke bwabo butuma batsindwa.
Ibi byatumye uyu munyamategeko muri Uganda, Male Mabirizi, ajuririra iki cyemezo muri uru rukiko rwa EAC.
Ikinyamakuru The East African kivuga ko Mabirizi ngo yatanze ikirego cye harenzeho iminsi ine kuyari yaragenwe n’amategeko.
Mabirizi we yanenze iby’iki cyemezo cy’uru rukiko, avuga ko cyafashwe kubera ko Umushinjacyaha Mukuru wa Uganda, afite ubwiganze n’ijambo rikomeye muri uru Rukiko rwa EAC.
Mabirizi yasabaga urukiko gutegeka leta ya Uganda, inzego zayo, komisiyo y’amatora n’izindi guhagarika gahunda z’amatora y’umukuru w’igihugu azaba mu 2021.
Yavugaga ko leta ya Uganda yahinduye imyaka y’umukuru w’igihugu ikoresheje ingufu, no kuba yaroherezaga abasirikare mu Nteko Ishinga Amategeko, ibintu bitemewe mu Itegeko Nshinga rya Uganda.
Uganda yo yabwiye uru rukiko kudahagarika aya matora, kuko byashoboraga kugira ingaruka ku gihugu.
Leta kandi yireguye ivuga ko uru rukiko rudafite ubushobozi bwo kuburanisha ibyerekeye imyaka y’umukuru w’igihugu agomba kuba afite ngo ayobore igihugu.
Yavuze ko iki kibazo ngo cyakemuwe n’inkiko za Uganda, bityo ko bidakenewe ko cyongera gusubirwamo.
Perezida Museveni w’imyaka 75 yagiye ku butegetsi mu 1986, azongera kwiyamamaza mu matora ateganyijwe mu 2021, ibintu abakurikiranira hafi politiki bavuga ko ari ugushaka kuzaba perezida w’iteka.
Itegeko Nshinga rya Uganda by’umwihariko mu ngingo ya 102 yakumiraga umuntu wese ufite imyaka 75 kwiyamamariza kuyobora igihugu, gusa Museveni afatanyije n’Abadepite mu mpera za 2017, nibwo iri tegeko ryahinduwe ahabwa uburenganzira bwo kuzongera kwiyamamaza.
Ubwanditsi
