Akarere ka Kisoro ko mu majyepfo y’Uburengerazuba bwa Uganda gahana imbibi n’u Rwanda niko kavugwako karimo umubare munini w’abanduye Covid-19 mu byumweru bitatu bishize, aho bikekwa hafi ½ cy’abahatuye banduye Covid-19.
Inkuru y’ijwi rya Amerika ivuga ko mu byumweru biri hagati ya bibiri na bitatu bishize , hapimwe abagera kuri 850 muri aba 437 basanzwe banduye Covid-19.
Umuyobozi w’aka karere Bizimana Abel, yavuze ko kubera ko batarabona ubushobozi bwo gupima buhagije ,mu byumweru 3 bishize bapimye abantu 850 muri aba , aberenga ½ cyabo basanzwemo ubwandu bwa Corona ndetse uyu muyobozi anemeza ko baramutse bagiye mu byaro byose bapima bishoboka ko umubare w’abandura ushobora kurenga ½ cy’abatuye aka karere.
Yagize ati” Twabanje kubura ubushobozi bwo gupima aho twafataga ibizamini tukabyohereza i Kampala. Gusa mu byumweru 2 cyangwa 3 bishize twabonye uburyo bwo gupima bwihuse. Muri ibi byumweru twapimye 850 muri abo 437 twabasanzemo Covid-19. Bivuze ko tumanutse mu byaro uyu mubare ushobora kutwereka ko hari abandi benshi tutazi banduye Covid-19 kandi bashobora kuba bari kuyanduzanya.”
Meya Bizimana yasabye abaturage kwitondera gukora ibirori , aho asaba abateguye ubukwe kuba babanye bakazasezerana nyuma igihugu gihaye umurongo iki cyorezo.
Aha muri Uganda , igihugu cyose kiri muri gahunda ya Guma mu Rugo, aho Guverinoma ivuga ko mu minsi 10 ishize , mu gihugu handura abarenga 1000. Imyanya mu bitaro yakira abarwaye iki cyorezo ikomeje kugabanuka ku buryo mu minsi iri imbere bishobora kuzabura aho byakirira abarwayi.
Imibare iheruka gutangwa na Minisiteri y’Ubuzima aha muri Uganda ivuga ko abarenga ibihumbi 740 bamaze kwandura iki cyorezo. Aha muri Uganda kandi bivugwa ko ikigeraranyo cy’ubwiyongere bwa Covid-19 kigeze kuri 17%.
