Umudepite mu nteko inshingamategeko ya Repubulika iharanira Demokarasi ya Congo Juvenal Munubo yanenze uburyo bushya bwashyizweho n’umuryango wa Afurika y’Iburasirazuba bugamije kurandura imitwe yitwaje intwaro mu burasirazuba bwa Congo.
Mu nama y’abakuru b’ibihugu bigize EAC yateraniye i Nairobi muri Kenya kuri uyu wa 21 Mata 2022, abakuru b’ibihugu bemeje ko Guverinoma ya Congo Kinshasa iganira n’Inyeshyamba zihakorera kuri uyu wa Gatanu.
Iyi nama kandi yanzuye ko igiye gushyiraho igisirikare gihuriweho cy’ibihugu binyamuryango bya EAC, kizafahsa mu guhashya imitwe y’inyeshyamba zizaba zanze gukurikira inzira y’amahoro yashyizweho n’akarere.
Umwe mu banenze uyu mwanzuro bwa mbere Ni Depite mu nteko inshingamategeko Juvenal Munubo umwe mu bahagarariye inzego z’umutekano mu nteko ishingamategeko ya RD Congo . Depite Munubo yanenze iyi myanzuro avuga ko ibi byose bidashonbora kuzana amahoro mu gihugu cya Congo.
Yagize ati “ Sinshyigikiye ibiganiro hagati ya Guverinoma n’imitwe y’inyeshyamba, kuko bisa no gushaka ubwumvikane bikaba igisebo kuri Leta. Ibi ni ugusubiramo amakosa yakozwe mbere nyamara ntiyatuzanira amahoro.
Kubwa Depite Juvenal Munubo, ngo izi nyeshyamba icyazihashya ni uko FARDC yazirasaho kugeza ababyemeye bose basubijwe mu buzima busanzwe.
Uyu mudepite akomeza avuga ko , aya ari amayeri y’ibihugu bituranye na Repbulika iharanbira Demokarasi ya Congo bisanzwe binafite inyota yo kujya muri Repubulika iharanira Demokarasi ya Congo kubw’inyungu zabyo bwite. Yagize ati: “Ni gute bizoroha kugenzura ingabo z’ibihugu bigera muri Bitanu byose byambaye impuzankano z’ibihugu byabo kandi zemerewe gutembera ku butaka bwacu. Ikindi ntitwakwirengagiza ko ibi bihugu bifite inyota yo kwinjira ku butaka bwacu”.
Depite Munubo asoza avuga ko, ingabo za Congo Kinshasa zakabaye zishorwamo amafaranga akaba arizo zihabwa inshingano zo kurwanya iyi mitwe y’inyeshyamba kugeza irandutse mu gihugu.
