Bizimana Djihad kapiteni w’Ikipe y’Igihugu ‘Amavubi’ yamaze kugirana amasezerano y’imyaka ibiri yo gukinira ikipe ya Kryvbas Kryvyi Rih yo mu gihugu cy Ukraine. Ni ikipe iri mu cyiciro cya mbere mu makipe yo muri icyo gihugu.
Uyu munsi kuwa 26 Nyakanga 2023, niho uyu mukinnyi byatangajwe, babinyujije ku mbuga nkoranyambaga z’iyi kipe ko Bizimana yasinyanye amasezerano n’ikipe yavuzwe haruguru.
Mu ntangiriro z’uku kwezi, Bizimana Djihad yari yavuzwe mu Ikipe ya Hapoel Ramat Gan Givatayim FC yo mu Cyiciro cya Kabiri muri Israël.
Ambasaderi wa Israel mu Rwanda Dr Ron Adam Ku wa 5 Nyakanga 2023, yatangaje ko yakiriye uyu mukinnyi ndetse azajya gukina mu gihugu cye.
Yagize ati “Uyu munsi nakiriye Kapiteni w’Ikipe y’Igihugu ‘Amavubi’, Djihad Bizimana, uri kwitegura kwerekeza muri Israël mu Ikipe ya Hapoel Ramat Gan Givatayim FC. Ndakwifuriza amahirwe masa no kugubwa neza.”
Shampiyona ya “Ukraine Premier League”, ibarizwamo amakipe 16. Biteganyijwe ko izatangira ku wa 28 Nyakanga 2023.
Ukraine Premier League yaherukaga gusubikwa mu mwaka w’imikino wa 2021-22 kubera intambara u Burusiya bwashoje kuri Ukraine.
Mu 2013, Kryvbas Kryvyi Rih yahuye n’ibibazo by’ubukungu isa nk’isenyutse iza kunamura umutwe nyuma, ibarizwa muri sosiyete y’imikino itandukanye ya Sport Club Kryvbas.
Bizimana Djihad w’imyaka 26 yazamukiye muri Etincelles FC yakinnyemo kugeza mu 2014 mbere yo kujya muri Rayon Sports yamazemo umwaka umwe, ahita ajya muri APR FC yakiniye imyaka itatu mbere yo kujya i Burayi.
I Burayi Bizimana yakiniye amakipe yo mu Bubiligi arimo Waasland-Beveren yamazemo imyaka itatu mbere yo kwerekeza muri KMSK Deinze yamazemo imyaka ibiri.
Jessica Umutesi
