Umunyamakurukazi wa CNBC Fiona Muthoni wigeze kuba igisonga cya Miss Rwanda akaba ubu akundana n’umunyarwenya Nkusi Arthur, yakuye igihu ku byari bimaze bivugwa kuri Dr Kayumba Christophe uherutse gushinga ishyaka rya politiki kumufata ku ngufu mu mwaka wa 2017 ubwo yamwigishaga muri Kaminuza y’u Rwanda.
Mu itangazamakuru hamaze iminsi havugwa inkuru zitavuzweho rumwe na mba ku wahoze ari umwalimu muri Kaminuza, Dr. Kayumba Christophe uherutse gushinga Rwanda Platform for Democracy wavuzweho bihereye kuri Twitter ko yaba yaragerageje gufata ku ngufu umukobwa yigishaga.
Ni ibintu byazanywe bwa mbere kuri Twitter n’uwitwa Kamaraba Salva abivuga adahishuye uwabimubwiye.
Dr. Kayumba yahakanye ibi abyita ‘propaganda’ ngo y’abarwanya ishyaka rye cyane ko ngo ‘babizanye ari bwo tukimara gushinga ishyaka ku mugaragaro.’
Nyuma y’igihe induru zarabaye impomamunwa kuri iyi nkuru, umukobwa bivugwa ko Kayumba yakoreyeho iki cyaha yaje gusohoka ikambere aratobora yaturira ku karubanda ko uwari umwalimu we Kayumba yashatse koko kumufata ku ngufu akamuhohotera.
Mu byavuzwe ni uko ngo uyu mukobwa [Fiona] Dr. Kayumba yamuhamagaye iwe ngo amubwire ku by’igitabo cy’abasoza kaminuza yandikaga. Kayumba yari umugenzuzi (supervisor) we muri ubwo bushakashatsi.
Ngo ageze iwe yasanze yasinze ashaka kumufatira mu ruganiriro undi aramwishikuza agenda yiruka anata telefoni ye hasi icyakora ngo umukozi wari muri urwo rugo amufungurira igipangu arasohoka yakutse umutima.
Ngo ubwo yamuhatiraga ko baryamana Fiona akabyanga, Kayumba yamubwiye ko azamufungira amayira yose ko ’nta kazi k’itangazamakuru azigera abona mu Rwanda’.
Icyo gihe Fiona yabimenyesheje Dr. Njuguna Joseph wayoboraga Ishami ry’Itangazamakuru n’Itumanaho muri UR, ariko ngo we ntacyo yabibwiyeho Kayumba.
Ubu ikirego kiri muri RIB ndetse Kayumba yarahamagawe abibazwaho ariko yabihakanye yivuye inyuma.
Muthoni Fiona ukorera Televiziyo Mpuzamahanga ya CNBC yagize ati “Umwalimu wanjye yankoreye ihohoterwa rishingiye ku gitsina. Igihe Kamaraba Salva yahishuraga ko Dr. Kayumba yankoreye ihohoterwa rishingiye ku gitsina muri Mutarama 2017, bamwe babajije impamvu ubu ari bwo mbizanye.”
Naringwa yakomeje abaza ati “Ariko se hari igihe gikwiriye uwahohotewe bishingiye ku gitsina aba agomba kubivugira.”
Miss Fiona Muthoni, unakora ibyo kumurika imideli ni umukunzi wa Nkusi Arthur wamamaye mu rwenya nka RUTURA akaba kandi ari umunyamakuru kuri KISS FM.
Dr Kayumba ni umwe mu bahanga igihugu gifite yaba mu myigishirize y’itangazamakuru no mu bushakashatsi. Yanashinze ikinyamakuru The Chroncles.
Gusa inshuro nyinshi yakunze kumvikana mu bikorwa by’imyitwarire mibi birimo kurwana n’ubusinzi, byanatumye amara umwaka muri Gereza nyuma yo guhamwa n’ibyaha bikorerwa ku kibuga cy’indege no gukoresha imbaraga cyangwa gukangisha gukoresha imbaraga ku kibuga cy’indege.
Kuva muri Gicurasi 2018, Fiona Muthoni Naringwa akorera Televiziyo ya CNBC ifite studio mu Mujyi wa Kigali. Yatangiye amasomo ye ya Kaminuza mu Itangazamakuru n’Itumanaho muri Kaminuza y’u Rwanda mu 2014 ayasoza mu 2018.
Mbere yo kujya gukorera CNBC, yakoreye TV10 mu ishami ry’amakuru y’icyongereza.
