Umunyamakuru wa Radio&TV 10 Adam Aboubakar uzwi nka DJ Adams yatangaje ko amaze iminsi igera kuri itatu yarabuze umwana we w’umukobwa, ndetse ko kugeza ubu nta makuru ye na make afite.
DJ Adams yabwiye Popote.rw ko umukobwa we witwa Uwimpaye Nadine ‘Nice’ yamusezeho kuwa 18 Ukuboza 2020 nyuma yo kumubwira ko atazongera kumubona na rimwe. Nyuma uyu mukobwa we ngo yaje gukuruho telefoni ye kugeza magingo aya.
DJ Adams yavuze ko mu butumwa bumusezera yandikiwe n’umukobwa we yamubwiye ko impamvu itumye amusiga ayizi, ndetse ngo nyuma y’ubwo butumwa nibwo yahise akuraho telefoni ye igendanwa.
Nadine ubusanzwe abana na se aho batuye ku murenge wa Muhima ho mu mujyi wa Kigali. Adams akomeza yemeza ko ubu afite impungenge z’aho umukobwa we yaba aherereye cyane ko we na Nyina bagerageje kumuhamagara ariko bagasanga telefoni ye itari ku murongo.
Dj Adams yakomeje avuga ko nyuma y’ibura ry’umukobwa we yabimenyesheje Urwego rw’igihugu rw’ubugenzacyaha ngo rumufashe gushakisha , gusa ngo kugeza magingo aya ntacyo biratanga kuko umukobwa we ataraboneka.
Dj Adams w’imyaka 44 y’amavuko afite abana babiri, umukobwa we Uwimpaye Nadine( Ari nawe wabuze) afite imyaka 20 n’umuhungu we Adam Aboubakar Junior ufite imyaka 6.
Dj Adams azwi mu itangazamakuru ry’imyidagaduro, aho yakoze ku bitangazamakuru binyuranye nka City Radio, Radio One, Hot FM na Radio 10 akorera kugeza magingo aya.
