Minisitiri w’Intebe wungirije w’u Bubiligi akana na Minisitiri w’Ububanyi n’Amahanga, Sophie Wilmès kuri uyu wa 14 Kamena 2021 yatangaje ko yakiriye umugore n’umukobwa wa Rusesabagina mu biro bye.
Nk’uko Minisitiri Wilmès yabitangarije kuri Twitter, icyabahuje ni ukugira ngo baganire ku mibereho ya Rusesabagina usanzwe afite ubwenegihugu bw’u Bubiligi ukurikiranwe n’ubutabera bw’u Rwanda.
Yagize ati: “Nakiriye umugore wa Bwana Rusesabagina n’umukobwa we basanzwe bakorana na Minisiteri y’Ububanyi n’Amahanga y’u Bubiligi. Turi gukurikirana uko ubuzima bwa Rusesabagina buhagaze, na cyane uburenganzira bwe bwo guhabwa ubutabera butabogamye. U Bubiligi bukomeje gukorana bya hafi n’abo bireba.”
Umwe mu bakobwa ba Rusesabagina witwa Carine Kanimba nyuma yo kubona ubutumwa bwa Minisitiri Wilmès, yamushimiye, yerekana ko uyu muyobozi yaba yemera ko uburenganzira bwa Rusesabagina butubahirizwa.
Carine yifashishije Twitter yagize ati: “Murakoze Madamu Minisitiri Sophie Wilmès kumva ko uku ari ugukandagira uburenganzira bwa Papa, Paul Rusesabagina, kandi ko n’uburenganzira bwe bwo guhabwa ubutabera butabogamye bukomeje kutubahirizwa. Turamutegereje ngo agaruke mu rugo. Ubuzima bwa Papa buri mu biganza byanyu.”
Iyi ngingo y’uko uburenganzira bwa Rusesabagina butubahirizwa tariki ya 4 Kamena 2021 yavuzwe na none n’abakobwa b’uyu mufungwa uri muri Gereza ya Nyarugenge, bavugaga ko aho afungiwe yambuwe uburenganzira burimo: guhabwa ibyo kurya, amazi n’imiti.
Gusa Urwego rw’Igihugu rushinzwe imfungwa n’abagororwa (RCS), rwarabihakanye, ruvuga ko Rusesabagina ahabwa uburenganzira nk’abandi bafungwa bose. Iki kibazo kandi cyasuzumwe na komisiyo y’igihugu ishinzwe uburenganzira bw’ikiremwamuntu, yageze muri Gereza ya Nyarugenge aho afungiwe, ivuga ko yasanze afatwa kimwe n’abandi.
Ku kijyanye n’ubutabera, muri Werurwe 2021 Rusesabagina yavuze ko atazasubira mu rukiko kubera ko ngo nta butabera yiteze mu Rwanda. Yabitangarije ubwo Inteko y’Abacamanza yari imaze gutesha agaciro ubusabe bwe bw’uko yahabwa amezi atandatu yo kwiga kuri dosiye ye yavugaga ko ari ndende cyane, urubanza rwe rukazasubukurwa nyuma y’icyo gihe.
Rusesabagina yatawe muri yombi muri Kanama 2020, akurikiranweho ibyaha by’iterabwoba. Afungiwe by’agateganyo muri Gereza ya Nyarugenge kuva muri Nzeri 2020.
