Umushoramari Simba Ngezayo yarasiwe mu muhanda wo mu Mujyi rwagati wa Goma, ubwo yari avuye kujyana umwana we ku ishuri riherereye hafi aho mu gace ka Volcans.
Abatangabuhamya babibonye bavuze ko umwicanyi yari ari kuri moto. Ngezayo akimara kuraswa yahise yihutanwa ku Bitaro bya Heal Africa ari naho yaje kugwa nyuma y’iminota 30 agejejweyo.
Perezida wa Sosiyete Sivile i Goma, Marrion Ngavho, yamaganiye kure ubu bwicanyi asaba ko hatangwa ubutabera.
Yagize ati “Sosiyete sivile n’abaturage muri rusange twamaganye ubu bwicanyi bwakozwe ku manywa y’ihangu saa 7h20’, bukozwe n’amabandi yari kuri moto, ahantu ku karubanda, bukorewe Simba Ngenzayo, umwana wa Ngezayo uhagarariye hoteli ya Karine Tours. Hihutirwe gukorwa iperereza no gukurikirana izo nkozi z’ikibi.”
Ubu bwicanyi bubaye mu gihe hari hashize igihe kitageze no ku kwezi undi mushoramari arasiwe iwe mu gace ka Kyeshero.
Simba Ngezayo ni umwana wa Victor Ngezayo, umushoramari ufite amahoteli menshi mu Mujyi wa Goma.
Mu 2008, undi mushoramari wo muri uyu muryango, Albert Ngezayo, na we yishwe n’abantu bitwaje intwaro mu gikorwa gisa neza n’icyabaye kuri Simba Ngezayo.
Dukuze Dorcas
