Urwego rw’Igihugu rw’Ubugenzacyaha (RIB) rwatangaje ko rwataye muri yombi Umuyobozi wa Gereza Nyarugenge iherereye i Mageragere, CSP Kayumba Innocent na bagenzi be babiri ari bo Ntakirutimana Eric na Mutamaniwa Ephraim.
Umuvugizi wa RIB w’Umusigire, Dr. Murangira B. Thierry yasobanuye ko batawe muri yombi ku wa Kane tariki 04 Gashyantare 2021. Bakurikiranyweho icyaha cy’ubuhemu, bakaba bakomeje gukorwaho iperereza.
Mu kiganiro yagiranye na RBA, Dr. Murangira yirinze kuvuga byinshi ku byo bakurikiranyweho kuko ngo bikiri mu iperereza.
CSP Kayumba Innocent afungiye kuri sitasiyo ya RIB ya Remera, Ntakirutimana Eric afungiye kuri sitasiyo ya RIB ya Kicukiro, naho Mutamaniwa Ephraim akaba afungiye kuri sitasiyo ya RIB ya Kimihurura hose hakaba ari mu Mujyi wa Kigali. Bose uko ari batatu bakoranaga muri Gereza y’i Mageragere.
