Umwe mu bayobozi bakomeye ba RIB afungiwe indonke

Urwego rw’igihugu rw’ubugenzacyaha RIB  rwataye muri yombi  uwari ukuriye RIB ku rwego rw’umujyi wa Kigali rumukurikiranyeho kwakira no kwaka indonke.

RIB ivuga ko  Kabayiza Ntabwoba Patrick yari umuyobozi w’uru  mu mujyi wa Kigali ukurikirana ibikorwa byose by’iperereza mu gutahura no gukumira ibyaha. Provincial Chief Intelligence Officer-PCIO).

RIB ivuga ko Kabayiza yatawe muri yombi kuwa 27 Nzeri 2022. Impuguke  bugenzacyaha zivuga ko gufata umuntu ariko bigatinda gutangazwa akenshi biterwa no kwanga ko abandi bavugwa muri iyo dosiye babimenya kandi bagishakishwa, bakaba bacika ubutabera cyangwa bagasibanganya ibimenyetso.

Hari amakuru avuga ko icyaha uyu mugabo akurikiranyweho gifitanye isano na Dosiye yari iri gukurikiranwa n’ubugenzacyaha.

Umuvugizi w’Urwego rw’igihug rw’ubugenzacyaha, RIB, Dr. Thierry B. Murangira yabwiye itangazamakuru  ko kuba umukozi wabo ku rwego rw’Intara yafashwe bigomba guhumuriza Abanyarwanda ko nta muntu n’umwe uru rwego rutakurikirana igihe cyose yaba yishe amategeko.

Ati: “ Ubutumwa Urwego rutanga ni uko umuntu wese wica amategeko n’ubwo yaba umukozi wacu, azafatwa akagezwa mu butabera. Abantu bagomba kumenya amategeko kandi bakayakurikiza.”
Gusaba, kwakira cyangwa gutanga indonke  bihanwa n’ingingo ya 4 y’itegeko N°54/2018 ryo ku wa 13/08/2018 mu Itegeko ryerekeye kurwanya ruswa.

Ubihamijwe n’urukiko ahabwa igifungo kirenze imyaka itanu (5) ariko kitarenze imyaka irindwi (7) n’ihazabu y’amafaranga y’u Rwanda yikubye inshuro kuva kuri eshatu (3) kugeza kuri eshanu (5) z’agaciro k’indonke yatse cyangwa yakiriye.

Ku cyaha cyo kwihesha ikintu cy’undi, hakoreshejwe uburinganya, cyo gihanwa n’ingingo ya 174 y’Itegeko No 68/2018 ryo kuwa 30/08/2018 riteganya ibyaha n’ibihano muri rusange.

Ugihamijwe ahanishwa igifungo kitari munsi y’imyaka ibiri ariko kitarenze itatu n’amafaranga y’u Rwanda atari atari munsi ya Frw 3,000,000  ariko atarenze Frw  5,000,000 .