Update: Abadepite ba Kivu y’amajyaruguru n’Ubuyobozi bw’intara barateganya kwimukira iBukavu

Ubuyobozi bw’intara ya Kivu y’amajyaruguru n’inteko ishinga amategeko y’iyo ntara batangiye kwimurira ibikoresho byabo mu mujyi wa Bukavu.

Mu gihe umutwe wa M23 usatiriye umujyi wa Goma usanzwe ari icyicaro gikuru cy’intara y’amajyaruguru, biravugwa ko Guverineri wa gisilikare w’iyo ntara ndetse n’abagize inteko ishinga amategeko bamaze icyumweru bakuye akarenge kabo mu mujyi wa Goma.

Isoko y’amakuru ya Rwandatribune.com iri mu mujyi wa Goma ivuga ko ayo makuru yayahawe n’umwe mu basilikare bakomeye bo mu kigo cy’ubutasi cya ANR.

Uyu musilikare akaba yarahamije ko Guverineri w’Intara Lt.Gen Ndima n’abadepite b’intara batangiye kwimurira icyicaro cyabo mu mujyi wa Bukavu kuko bafite amakuru ko mu gihe cya vuba, uyu mujyi ushobora kugwa mu maboko ya M23.

Uyu musilikare kandi yakomeje kuvuga ko ingabo za FARDC, nazo ziteguye kwimura ibirindiro byazo bibarizwa mu mujyi wa Goma bikimurirwa mu gace kagizwe ibanga.

Ifungwa ry’umuhanda Goma-Rutschuru n’ifatwa ry’ikigo gikomeye cya Lumangabo byateye ubwoba abari mu mujyi wa Goma ku buryo icyoba ari cyose ku batuye muri uwo mujyi.

Uwineza Adeline