Gen. Big Mugabo w’igisirikare cya Repubulika Iharanira Demokarasi ya Congo (FARDC) uyoboye urugamba rwo guhashya M23, yasimbutse urupfu ubwo yagabwagaho igitero cyo kumwivugana, kikamuhusha ahubwo kigakomeretsa abarinzi be barimo Lt.Ntwari ubayoboye.
Nkuko isoko y’amakuru ya Rwandatribune iri Bulungu ibivuga, mu masaha ya saa tanu ubwo inyeshyamba za M23 zari zimaze kugota umujyi wa Kirorirwe muri Teritwari ya Masisi, Gen.Mugabo usanzwe ari Komanda wa FARDC mu gace ka Masisi na Walikare, yataye imodoka akizwa n’amaguru.
Muri uko guhunga, amakuru avuga ko ariho yakubitanye n’igico cy’abarwanyi ba M23 bari bamuteze bamusukaho amasasu menshi gusa akaba atamufashe, ababyiboneye n’amaso bavuga ko Lt.Ntwari ukuriye abamurinda yakomeretse.
Ubwo twandikaga iyi nkuru, abaturage bavuga ko imirambo myinshi y’inyeshyamba za FDLR na FARDC yari ikinyanyagiye mu mihanda.
Ally MWIZERWA
RWANDATRIBUNE.COM
