Mu gitondo cyo kuri uyu wa Mbere tariki 02 Mutarama 2023, urugamba hagati y’umutwe wa M23 n’igisirikare cya Congo (FARDC) ubu kiri gufashwa n’abacanshuro b’Abarusiya, rwakomereje i Masisi.
Amakuru dukesha isoko y’amakuru ya Rwandatribune iri muri Congo Kinshasa, avuga ko iyi mirwano yatangiye mu gitondo cyo kuri uyu wa Mbere ubwo FARDC ifatanyije n’imitwe yiyambaje irimo FDLR, bagabaga ibitero ku birindiro bya M23 muri Masisi.
Uyu waduhaye amakuru avuga kandi ko uretse iyi mitwe imaze iminsi ikorana na FARDC irimo Mai-Mai, Nyatura, ACPLS, na CODECO, ubu bufatanye bwaniyongereyeho abacanshuro b’indwanyi z’Abarusiya zo mu itsinda rya Wagner.
Yagize ati “Amasasu yabyutse ari kuvuza ubuhuha, humvikanye urusaku rw’amasasu menshi.”
Umutwe wa M23 wivuganye abagera muri 85 bo ku ruhande rwa FARDC mu cyumweru gishize, watangaje ko ugomba gufata Masisi yose.
Imirambo y’aba biciwe mu mirwano iremereye yabereye mu gace ka Bwiza, banasanzemo uw’umuzungu byavuzwe ko ari umwe muri aba bacanshuro bahawe ikiraka n’ubutegetsi bwa Congo Kinshasa.
Umutwe wa M23 kandi kuri iki Cyumweru tariki 01 Mutarama 2023, wagaragaje intwaro zirimo n’iziremereye wafashe nyuma yo gutabwa n’abasirikare ba FADRC ndetse n’aba bari kuyifasha.
RWANDATRIBUNE.COM
