Urukiko rw’Ibanze rwa Nyarugenge ruri I Nyamirambo rumaze gusubika urubanza kw’ifungwa n’ifungurwa ry’agateganyo rya Dr Francis Habumugisha, Umuyobozi wa Goodrich TV. Uyu akurikiranweho gukubita abakobwa babiri b’abakozi be, Diane Kamali na Mary Magdalene Nzaramba.
Urukiko rwasubitse itangazwa ry’umwanzuro ku busabe bwe bwo gukurikiranwa adafunzwe.
Umucamanza yavuze ko umwanzuro uzatangazwa kuwa Mbere w’icyumweru gitaha kubera ko ubushize humvikanye ibibazo byinshi, umwanditsi w’urukiko atabashije kubika muri system y’urukiko.
Umucamanza yavuze ko CD, iriho ibimenyetso by’ubushinjacyaha, itari yabitswe muri system y’urukiko kandi ko urukiko rwari rukiri gusuzuma inyandiko z’abantu Habumugisha yatanze nk’abishingizi mu gihe yaba yemerewe gukurikiranwa adafunzwe.
Bivugwa ko Umuyobozi wa Televiziyo ya Goodrich yakubise Kamali urushyi, yarangiza akanamena telephone ye ubwo bari mu nama y’abakozi.
Ibi ngo bikaba byarabaye ubwo Habumugisha yamenyaga ko Kamali ari kumufata amashusho n’amajwi ubwo yari arimo na none gutuka umwe mu bakozi bagenzi be muri iyo nama.
Habumugisha yatawe muri yombi kuwa 11 Nzeri, nyuma y’aho Kamali anyujije kuri twitter video igaragaza umukoresha we amukubita urushyi.
Ubwo yumvwaga bwa mbere, Habumugisha yahakanye ko yakubise uwo ari we wese. Yongeyeho ko abamushinja bari mu kagambane n’abanyemari bagenzi be batumvikana.
Karegeya Jean Baptiste
