Urukiko rwisumbuye rwa Nyarugenge rwasubitse urubanza rwa Paul Rusesabagina ujuririra gufungwa by’agateganyo kuko umwunganizi we Me Gatera Gashabana adahari aho ari i Arusha muri Tanzania.
Mu cyumweru gishize, urugaga rw’abunganizi mu mategeko mu Rwanda, rwakuyeho abunganizi babiri rwari rwarahaye Bwana Rusesabagina ku buntu igihe yatangiraga kuburana.
Aba bunganizi ntibigeze bemerwa n’umuryango we, washyizeho abawo barindwi, barimo umwe ukorera mu Rwanda ari we Gatera Gashabana.
Mu rukiko uyu munsi hifashishijwe ikoranabuhanga, uregwa ari muri gereza yasabye ko ataburana uyu munsi kuko umwunganizi we Gashabana ari i Arusha mu rundi rubanza.
Yavuze ko kugira ngo Gashabana agere mu Rwanda bisaba kubanza kwipimisha Covid-19, kandi muri Tanzania ngo bamuhaye iminsi itanu kugira ngo abone igisubizo.
Rusesabagina yasabye urukiko ko urubanza rwe rwashyirwa tariki 20 z’uku kwezi kwa 11, kugira ngo umwunganira abone umwanya uhagije.
Ubushinjacyaha bwavuze ko ibi ari ugutinza urubanza rw’ifungwa n’ifungurwa ry’agateganyo kandi ngo ubusanzwe rugomba kumara iminsi micyeya.
Urukiko rwavuze ko uregwa afite uburenganzira bwo kuburana yunganiwe, rutegeka ko urubanza rwe ruzaburanishwa tariki 20 Ugushyingo 2020 nk’uko uregwa yabisabye.
Mu gihe yaburanye mu minsi ishize, Gashabana ntiyemerewe kunganira Rusesabagina kuko yari afite abandi bamwunganiraga. Hari abandi kandi barimo Umubiligi Me Vincent Lurquin, nabo bavuga ko basabye kumwunganira ariko ntibabyemererwe.
Mu minsi yashize, ukuriye urugaga rw’abunganizi mu nkiko mu Rwanda yavuze ko nta mikoranire iriho hagati y’abo mu Rwanda n’abo mu Bubiligi, ku buryo bakemererwa kunganira abaregwa mu Rwanda.
Rusesabagina aregwa ibyaha 13 bishingiye ku bitero byiciwemo abantu byakozwe n’umutwe w’inyeshyamba wa FLN, ibyaha mu rukiko atigeze yemera cyangwa ngo ahakane gusa akaba yarasabye imbabazi kuri buri umwe wese ibi bitero byaba byaragizeho ingaruka, aho yavuzeko nawe yababajwe n’ibi bitero.
Src.: BBC
